រថក្រោះអ៊ីស្រាអែលបានវាយប្រហាររុលចូលទៅយ៉ាងជ្រៅក្នុងទីក្រុងមួយនៅកណ្តាលតំបន់ហ្កាហ្សាស្ទ្រីបកាលពីថ្ងៃព្រហស្បតិ៍ ទី២៨ ធ្ន បន្ទាប់ពីការទម្លាក់គ្រាប់បែកឥតឈប់ឈរជាច្រើនថ្ងៃ បាន​បង្ខំ​ឱ្យគ្រួសារប៉ាឡេស្ទីនរាប់ម៉ឺននាក់ ដែលបានភៀសខ្លួនរួចហើយ ឱ្យភៀសខ្លួន​ជា​ថ្មី​ទៀត​ក្នុង​ចំនួន​យ៉ាង​ច្រើន​សន្ធឹកសន្ធាប់។

អ្នកសារព័ត៌មានជនជាតិប៉ាឡេស្ទីនម្នាក់បានបង្ហោះរូបភាពបង្ហាញពីកងរថក្រោះអ៊ីស្រាអែលនៅជិត​វិហារអ៊ីស្លាមមួយនៅក្នុងតំបន់ប៊ូរ៉េច(Bureij) ខណៈកងរថពាសដែក បានរុលចេញ​ពី​សួន​ផ្កា​នៅ​ជាយក្រុងភាគខាងកើត។

ក្រុម​មន្ត្រីសុខាភិបាលបាននិយាយថា ជនជាតិប៉ាឡេស្ទីនបីនាក់បានស្លាប់​នៅក្នុង​ការ​វាយ​ប្រហារ​ដោយ​មីស៊ីល​របស់អ៊ីស្រាអែលទៅលើផ្ទះមួយនៅភាគឦសានជំរំ ម៉ាកហាហ្ស៊ី (Maghazi) នៅ​កណ្តាល​តំបន់​ហ្កាហ្សា។

កងកម្លាំង​អ៊ីស្រាអែលបន្ថែមទៀតនៅភាគខាងត្បូង បានវាយប្រហារ​តំបន់​ជុំវិញ​មន្ទីរ​ពេទ្យ​មួយ​នៅ​ចំ​កណ្តាល​ទីក្រុង Khan Younis ដែលជាទីក្រុងភាគខាងត្បូងដ៏សំខាន់របស់ តំបន់ហ្កាហ្សា ជា​ទី​ដែល​អ្នក​ស្រុកភ័យខ្លាចថាមានការវាយលុកដោយថ្មើរជើងរុលទៅមុខជាថ្មីចូលទៅក្នុងដែនដី ប្រមូ​ល​ផ្តុំ​ដោយក្រុមគ្រួសារជាច្រើន ដែលបាត់បង់ផ្ទះសម្បែងក្នុងរយៈពេល ១២ សប្តាហ៍​នៃ​សង្រ្គាម​អ៊ីស្រាអែល និងក្រុមហាម៉ាស។

អ្នក​នាំពាក្យក្រសួងសុខាភិបាលហ្កាហ្សា លោក អាស្រាហ្វ អាល់ គីដ្រា (Ashraf Al-Qidra) បាន​និយាយ​ថា នៅក្នុងការវាយប្រហារតាមអាកាសចុងក្រោយរបស់អ៊ីស្រាអែល បានសម្លាប់​ជន​ជាតិ​ប៉ាឡេស្ទីន​ ២០នាក់ និងរងរបួស ៥៥ នាក់ ក្នុងទីក្រុង Rafah ដែលជាទីក្រុងសំខាន់​មួយ​នៅ​ជិត​ព្រំដែន​ភាគ​ខាងត្បូងជាមួយប្រទេសអេហ្ស៊ីប។ យោងតាមក្រុមគ្រូពេទ្យនិងអ្នកស្រុក អគារ​ដែល​ត្រូវ​បាន​ទម្លាក់គ្រាប់បែកចំគឺជាផ្ទះជនស៊ីវិលដែលត្រូវផ្លាស់ប្តូរទីលំនៅ៕