សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា សុខសន្តិភាពបង្ករជម្រើស និងបង្កើតឱកាសដល់កូនចៅខ្មែរគ្រប់រូប ហើយផលលាភនៃសុខសន្តិភាពនេះ មិនមែនបានត្រឹមតែបច្ចុប្បន្ននោះទេ គឺបានផលដល់កូនខ្មែរគ្រប់ជំនាន់ និងជារៀងរហូតតទៅ។

ការលើកឡើងរបស់សម្តេចធិបតី ធ្វើឡើងនៅក្នុងពិធីអបអរសាទរខួបលើកទី២៥ឆ្នាំ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកបដោយភាពជោគជ័យនូវនយោបាយឈ្នះ ឈ្នះ និងការប្រារព្ធខួប៥ឆ្នាំ នៃការកសាងវិមានឈ្នះ ឈ្នះ នាព្រឹកថ្ងៃទី២៩ ខែធ្នូ ឆ្នាំ២០២៣នេះ នៅក្នុងវិមាន ឈ្នះ ឈ្នះ។

សម្តេចធិបតី នាយករដ្ឋមន្រ្តីបានបញ្ជាក់ថា យើងទាំងអស់គ្នា មិនថាកងកម្លាំងប្រដាប់​អាវុធគ្រប់​ប្រភេទប្រជាពលរដ្ឋខ្មែរទាំងអស់ គឺត្រូវចូលរួមថែរក្សាសន្តិភាព ដែលរកបានដោយកម្រនេះ​ឲ្យខាងតែបាន ដោយសន្តិភាពនេះហើយបានផ្តល់ឱកាសឲ្យយើងទាំងអស់គ្នា​បានឈរនៅកន្លែង​នេះរួមគ្នាបាន ជាក់ស្តែង សន្តិភាពដែលកម្ពុជាយើងទទួលបានក្នុងរយៈពេល២៥ឆ្នាំមកនេះ គឺបានផ្តល់ឱកាសឲ្យកម្ពុជាមានការអភិវឌ្ឍលើគ្រប់វិស័យ ទាំងផ្នែកហេដ្ឋារចនាសម្ព័ន្ធ វិស័យអប់រំ សុខាភិបាល ឱកាសការងារ និងផលលាភជា ច្រើនទៀត។

ជាមួយគ្នានោះដែរ សម្តេចធិបតី ហ៊ុន ម៉ាណែត ក៏បានលើកឡើងផងដែរថា ដរាបណាកម្ពុជា​បន្តមានសុខសន្តិភាពគឺកម្ពុជា នឹងកាន់តែរីកចម្រើនលើគ្រប់វិស័យបន្ថែមទៀត ខណៈមហិច្ឆតារបស់​រាជរដ្ឋាភិបាលនឹងខិតខំលើកស្ទួយកិត្យានុភាពប្រទេសកម្ពុជាឲ្យកាន់តែខ្ពស់ត្រដែត​ឡើង​បន្ថែមទៀត នៅលើឆាកអន្តរជាតិ ដោយមហិច្ឆតាទាំងនេះ គឺដើម្បីផលប្រយោជន៍របស់ប្រជាជន និងប្រទេសជាតិទាំងមូល៕អត្ថបទបាន ចក់