ថ្ងៃទី២៩ ដល់ថ្ងៃទី៣០ ខែធ្នូនេះ រាជរដ្ឋាភិបាលកម្ពុជា បានរៀបចំប្រារព្ធខួបលើកទី២៥ ការ​បញ្ចប់​សង្គ្រាមស៊ីវិលនៅកម្ពុជា ការអនុវត្តប្រកបដោយភាពជោគជ័យនយោបាយឈ្នះ ឈ្នះ តាមរយៈ​ទិវាដ៏វិសេសវិសាលនេះដែរ ក្រុមវិនិយោគិន ម្ចាស់អាជីវកម្ម សហគ្រាសទាំងជាតិ និង​អន្តរជាតិ បានថ្លែង អំណរគុណការអនុវត្តនយោបាយឈ្នះ ឈ្នះ បញ្ចប់សង្គ្រាម និង​ការ​បង្កើត​ឱកាស​វិនិយោគទុនដ៏ល្អប្រសើរ រហូតមកដល់បច្ចុប្បន្ន។

បណ្តាម្ចាស់អាជីវកម្មមកពីវិទ្យាស្ថានម្ហូបអាហារ សណ្ឋាគារ Long Live ម្ចាស់អាជីវកម្មនានាទៀត បាន​ថ្លែង​ប្រាប់ BTV នៅថ្ងៃទី២៩ ខែធ្នូនេះថា ការអនុវត្ត​ប្រកប​ដោយ​ភាព​ជោគ​ជ័យ​នយោបាយ​ឈ្នះ ឈ្នះ ការបញ្ចប់សង្គ្រាមស៊ីវិល និងការមានសុខសន្តិភាព ស្ថេរភាពនយោបាយ រយៈពេល​២៥​ឆ្នាំម​កនេះ គឺបានទាក់ទាញអ្នកវិនិយោគទុនជាតិអន្តរជាតិ និងទេសចរ​អន្តរជាតិ​ជា​ច្រើន​មក​កម្ពុជា​ បានផ្តល់នូវអត្តប្រយោជន៍ ការអភិវឌ្ឍន៍ កំណើនពាណិជ្ជកម្ម បង្កើនការងារ មុខរបរ និង​ជំរុញ​កំណើនសេដ្ឋកិច្ចជាតិជាបន្តបន្ទាប់។

សូមបញ្ជាក់ថា ប្រារព្ធខួបលើកទី២៥ ការបញ្ចប់សង្គ្រាមស៊ីវិលនៅកម្ពុជា ការ​អនុវត្ត​ប្រកប​ដោយ​ភាព​ជោគជ័យនយោបាយឈ្នះ ឈ្នះ បានរៀបចំឡើង​ស្រប​ពេល​នឹង​ខួប៥ឆ្នាំ នៃ​ការ​កសាង​វិមាន​ឈ្នះ ឈ្នះ ដែលជាសំណង់ប្រវត្តិសាស្ត្រមួយសាងសង់ឡើងដើម្បីរំលឹក ដល់វីរភាព និងគុណតម្លៃ នៃ​ការ​អនុវត្តនយោបាយឈ្នះ ឈ្នះ ដែលបានផ្តួចផ្តើមឡើងដោយ សម្តេច​អគ្គ​មហា​សេនា​បតី​តេជោ ហ៊ុន សែន ដែលជាស្ថាបនឹក និងជាមគ្គុទេ្ទសក៍​ឯក សន្តិភាព របស់កម្ពុជា និង​ជា​បង្កើន​ការ​យល់​ដឹ​ង​ពីប្រវត្តិសាស្ត្រជាតិ បណ្តុះស្មារតីស្នេហាជាតិមាតុភូមិ និងបន្តថែរក្សាស្ថេរភាព សន្តិសុខ និង​ការអភិវឌ្ឍជាតិមាតុភូមិកម្ពុជា៕ អត្ថបទ៖ ស៊ុម សុខជា