ភ្នំពេញ៖ នៅថ្ងៃស្អែកនេះ ក្រុមគ្រូពេទ្យកងទ័ពនៃកងយោធពលខេមរភូមិន្ទនឹងចាប់ផ្តើមយុទ្ធនាការចាក់វ៉ាក់សាំងជូនបងប្អូនប្រជាពលរដ្ឋទូទៅចាប់ពីអាយុ១៨ឆ្នាំឡើងទៅ ខណ:ខេត្តចំនួន៣ផ្សេងទៀតនឹងចាប់ផ្តើមដំណើរការចាក់វ៉ាក់សាំងដូចគ្នា។
បន្ទាប់ពីមានការណែនាំដ៏ខ្ពង់ខ្ពស់ពីសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សំដៅគិតគូរពីសុខភាពសាធារណ:ប្រជាពលរដ្ឋនៅទូទាំងប្រទេស ក្រុមគ្រូពេទ្យកងទ័ពនៃកងយោធពលខេមរភូមិន្ទ ត្រូវបានរៀបចំបន្តបេសកកម្មរបស់ខ្លួន ដើម្បីរៀបចំដំណើរការចាក់វ៉ាក់សាំងជូនប្រជាពលរដ្ឋ ជាកម្មករ កម្មការីនី និងយោជិត ខេត្តព្រះសីហនុ ចាប់ពីថ្ងៃទី២២ ខែមិថុនា ឆ្នាំ២០២១។
ក្នុងនោះ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ និងជាប្រធានប្រតិបត្តិចាក់វ៉ាក់សាំងការពារជំងឺកូវីដ១៩ នឹងអញ្ជើញចុះពិនិត្យតាមមណ្ឌលទីតាំងចាក់វ៉ាក់សាំងក្នុងក្រុងព្រះសីហនុ ដើម្បីជំរុញឱ្យដំណើរការប្រកបទៅដោយរលូន និងមានត្រឹមត្រូវតាមវិធានការសុខាភិបាល។
នាយឧត្តមសេនីយ៍ ឥត សារ៉ាត់ បានបញ្ជាក់ថា តាមរយៈបទពិសោធននៃដំណើរការចាក់វ៉ាក់សាំងជូនប្រជាពលរដ្ឋនៅអតីតតំបន់ក្រហមនៃរាជធានីភ្នំពេញ កងទ័ពមានសមត្ថភាព និងលទ្ធភាពគ្រប់គ្រាន់សម្រាប់ដំណើរការរៀបចំចាក់ដូសទី១ និងដូសទី២ និងយកចិត្តទុកដាក់រៀបចំឲ្យប្រជាពលរដ្ឋនីមួយៗបានទទួល ដោយមានរបៀបរៀបរយ និងការពារពីការឆ្លងរាលដាលដោយជំងឺកូវីដ១៩។
នាយឧត្តមសេនីយ៍ ឥត សារ៉ាត់ បានបន្តថា ក្នុងចំណោមប្រជាពលរដ្ឋទូទៅចំនួនជាង១៩ម៉ឺននាក់រស់នៅខេត្តព្រះសីហនុ ដែលត្រូវចាក់វ៉ាក់សាំងចាប់ពីអាយុ១៨ឆ្នាំឡើង ក្នុងនោះកងទ័ពមានតួនាទីចាក់ជូនប្រជាពលរដ្ឋចំនួនប្រមាណ១២ម៉ឺននាក់ ដែលរស់នៅតាមបណ្តាក្រុង ស្រុក និងតំបន់សេដ្ឋកិច្ចពិសេសជាដើម។
ទន្ទឹមនឹងប្រជាពលរដ្ឋខេត្តព្រះសីហនុត្រៀមចាក់វ៉ាក់សាំងដែលនឹងចាប់ផ្តើមនៅថ្ងៃស្អែក នាយឧត្តមសេនីយ៍ ឥត សារ៉ាត់ បានឱ្យដឹងទៀតថា មានខេត្តចំនួន៣ផ្សេងទៀត រួមមាន ខេត្តកោះកុង ខេត្តកំពង់ស្ពឺ និងខេត្តតាកែវ កងទ័ពក៏នឹងចាប់ផ្តើមបើកដំណើរការជាផ្លូវចាក់វ៉ាក់សាំងជូនប្រជាពលរដ្ឋទូទៅផងដែរ។
សូមជម្រាបជូនថា ការចាក់វ៉ាក់សាំងការពារជំងឺកូវីដ-១៩នៅក្នុងខេត្តព្រះសីហនុ ស្អែកនេះ នឹងប្រព្រឹត្តទៅក្នុងក្រុងចំនួន២ ស្រុកចំនួន៣ និងតំបន់សេដ្ឋកិច្ចពិសេសចំនួន២ ដែលស្មើនឹងទីតាំងចាក់វ៉ាក់សាំងចំនួន១៩ទីតាំង ហើយ១២ទីតាំងចាក់ដោយក្រុមគ្រូពេទ្យកងទ័ព និង៧ទីតាំងផ្សេងទៀតចាក់ដោយក្រុមគ្រូពេទ្យនៃមន្ទីរសុខាភិបាលខេត្តព្រះសីហនុ៕ អត្ថបទ៖ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
