ភ្នំពេញ៖ លោក ហេង សំណាង ប្រធានយុវជនសង្គមស៊ីវិល នៃសមាគមយុវជនខ្មែរមហានគរ បាន​ថ្លែងថា ថ្ងៃទី២៩ ខែធ្នូនេះ គឺជាថ្ងៃប្រវត្តិសាស្ត្រខួបលើកទី២៥ នៃការបញ្ចប់ សង្គ្រាម​ស៊ីវិល​នៅ​កម្ពុជា ដូច្នេះក្នុងនាមជាយុវជនបានយល់ឃើញថា នយោបាយឈ្នះ ឈ្នះ របស់សម្តេចតេជោ ហ៊ុន សែន គឺជាគំរូវីរភាពប្រវត្តិសាស្ត្រមួយដែលកូនខ្មែរ ជាពិសេសសិស្ស និស្សិត បញ្ញវន្ត បាន​ចងចាំ​នូវ​ដានប្រវត្តិសាស្ត្រមួយនេះ។

លោកបន្តថា ប្រទេសមួយ ឬតំបន់មួយដែលមានបញ្ហាសន្តិសុខសង្គម ឬក៏មានសង្គ្រាម ពិត​ណាស់​ប្រទេស​គឺមិនអាចអភិវឌ្ឍន៍បានទេ។ ជាហេតុដែលនាំ​ឱ្យប្រទេស​កម្ពុជា​ក្រោម​ការ​ដឹកនាំ​ ​នយោបាយឈ្នះ ឈ្នះ និងសមាហរណកម្មនានារបស់សម្តេចតេជោ ហ៊ុន សែន គឺសម្តេចបាន​ខិត​ខំ​​ប្រឹ​ងប្រែងធ្វើយ៉ាងណាដើម្បីដឹកនាំប្រទេស បង្កើនការយល់ដឹងអំពីប្រវត្តិសាស្ត្រ ស្មារតី ស្រឡាញ់​ជាតិ មាតុភូមិ និងបន្តថែរក្សាស្ថិរភាព សុខសន្តិភាព និងការអភិវឌ្ឍជាតិមាតុភូមិ។

លោក ហេង សំណាង បានបន្តទៀតថា អ្វីដែលយុវជនចង់ឃើញ ក្នុងនាមជាយុវជនខ្មែរ គឺ​ធ្វើ​យ៉ាង​ណាតា​មដានប្រវត្តិសាស្ត្រ ក៏ដូចជាឱ្យតម្លៃការធ្វើកិច្ចការងារមួយដើម្បីមាតុភូមិកម្ពុជា។ ចំពោះ​ការរៀបចំខួបលើកទី២៥ នៃការបញ្ចប់សង្គ្រាមស៊ីវិលនៅកម្ពុជា និងខួបលើកទី៥ឆ្នាំ នៃ​ការ​កសាង​វិមាន​ឈ្នះឈ្នះ ក៏ដូចជាការរម្លឹកដឹងគុណ និងការផ្តួចផ្តើមដោយសម្តេចតេជោ ហ៊ុន សែន ដែល​ជា​ស្ថាបនិកនិងជាអគ្គមគ្គុទេសសន្តិភាព។

លោក ហេង សំណាង បានបន្តថា ក្នុងនាមជាយុវជនសង្គមស៊ីវិលជំនាន់ក្រោយ សូមថ្លែង​អំណរ​គុណ​យ៉ាង​ជ្រាល​ជ្រៅបំផុតចំពោះថ្នាក់ដឹកនាំនីតិកាលទី៦ និងនីតិកាលទី៧ ក្រោមការដឹកនាំ​របស់​សម្តេច​មហាបវរធិបតី ហ៊ុន ម៉ាណែត ដែលកំពុងបន្តដឹកនាំនាវាកម្ពុជាឱ្យកាន់តែរីកចម្រើន និង​អភិវឌ្ឍន៍ធនធានមនុស្ស អភិវឌ្ឍន៍ធនធានសេដ្ឋកិច្ចកម្ពុជា ប្រកបដោយចីរភាព៕