ក្រសួងវប្បធម៌ និងវិចិត្រសិល្បៈ នៃព្រះរាជាណាចក្រកម្ពុជា អង្គការអភិវឌ្ឍន៍អន្តរជាតិអាល្លឺម៉ង់ (GIZ) នៅថ្ងៃទី២៩ ខែធ្នូ ឆ្នាំ ២០២៣នេះ នៅទីស្តីការក្រសួងវប្បធម៌ បានអនុស្សរណៈ នៃការយោគយល់គ្នា ដើម្បីការចងចាំ ការកសាងសមត្ថភាព ការស្រាវជ្រាវ និងការអប់រំនៅសារមន្ទីរឧក្រិដ្ឋកម្មប្រល័យពូជសាសន៍ទួលស្លែង។
អនុស្សរណៈនៃការយោគយល់គ្នា គឺជាដំណាក់កាលថ្មីសម្រាប់កម្មវិធីសេវាសន្តិភាពស៊ីវិល-ជីអាយហ្សិតនៅកម្ពុជា ដោយត្រូវបានអនុម័តសម្រាប់ឆ្នាំ២០២៤ ដល់ឆ្នាំ២០២៦ ក្រោមប្រធានបទ «យុត្តិធម៌ និងការផ្សះផ្សាក្នុងបរិបទនៃដំណាក់កាលសេសសល់របស់សាលាក្ដីខ្មែរក្រហម»។ តាមរយៈអនុស្សរណៈនេះ ភាគីទាំងពីរបានឯកភាពលើគម្រោងសហប្រតិបត្តិការនៅសារមន្ទីរឧក្រិដ្ឋកម្មប្រល័យពូជសាសន៍ទួលស្លែង។
លោក ហង្ស និស្ស័យ ប្រធានសារមនី្ទរឧក្រិដ្ឋកម្មប្រល័យពូជសាសន៍ទួលស្លែង ថ្លែងប្រាប់ BTV ព័ត៌មាន យ៉ាងដូច្នេះថា អនុស្សរណៈនេះ ក៏បានបន្តការអនុវត្តសកម្មភាពចាប់ពីឆ្នាំ២០១៨ ឆ្នាំ២០២០ រហូតដល់ចុងឆ្នាំ២០២៣នេះ ដោយភាគីទាំងពីរព្រមព្រៀងបន្តកិច្ចសហប្រតិបត្តិការប្រកបដោយផ្លែផ្កានេះតទៀត។
ជាចុងក្រោយប្រធានសារមនី្ទរឧក្រិដ្ឋកម្មប្រល័យពូជសាសន៍ទួលស្លែងបញ្ជាក់ថា គិតចាប់តាំងពីឆ្នាំ២០១៥ រហូតមកដល់បច្ចុប្បន្ន តាមរយៈកិច្ចសហប្រតិបតិ្តការនេះ បានធ្វើការជាមួយរដ្ឋាភិបាលអាល្លឺម៉ង់ ទាំងគំនិតរៀបចំសារមនី្ទរ រៀបចំផែនការអប់រំផ្សព្វផ្សាយ។ ក្នុងនោះអង្គការ ជីអាយហ្សិត បានរៀបចំផ្តួចផ្តើមឲ្យមានសៀវភៅណែនាំការបង្រៀនអំពីប្រវតិ្តសាស្រ្ត និងរៀបរៀងឲ្យចេញជា ២០ សកម្មភាពដើម្បីឲ្យលោកគ្រូ អ្នកគ្រូ បង្រៀនសិស្ស ក្នុងលក្ខខណ្ឌមួយឲ្យសិស្សានុសិស្សបានចូលសិក្សាកាន់តែផុសផុលនៅសារមនី្ទរឧក្រិដ្ឋកម្មប្រល័យពូជសាសន៍ទួលស្លែង៕ អត្ថបទ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
