ឯកឧត្តម ឧត្តមសេនីយ៍ឯក សួន សំណាង អគ្គនាយករងអគ្គនាយកដ្ឋាននយោបាយ និង​កិច្ច​ការ​បរទេស នៃក្រសួងការពារជាតិ បានដឹកនាំសហការី ធ្វើបទបង្ហាញអំពីគោល នយោបាយ​ការពារ​ជាតិ (សៀវភៅ «ស» ការពារជាតិ ឆ្នាំ ២០២២) ជូនដល់គណៈកម្មការទី៤ នៃរដ្ឋសភា អំពី​ការ​អនុវត្ត​កម្ម​វិធីនយោបាយ និងយុទ្ធសាស្ត្របញ្ចកោណរបស់រាជរដ្ឋាភិបាលនីតិកាលទី៧ និង​ប្រសិទ្ធភាព នៃ​ការអនុវត្តច្បាប់ និងលិខិតបទដ្ឋានគតិយុត្តនានា ដែលក្រសួង​ការពារ​ជាតិ​ត្រូវ​អនុវត្ត​បន្ត​។

ក្នុងឱកសកិច្ចប្រជុំនេះ គណៈកម្មការជំនាញទាំង ១០ របស់រដ្ឋសភា ដឹកនាំដោយឯកឧត្តម កែប ជុតិមា ប្រធានគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន នៃ​រដ្ឋសភា (គណៈកម្មការទី៤) នៅសាលសន្និសីទបាយ័ន វិមានរដ្ឋសភា នាព្រឹកថ្ងៃទី២៨ ខែធ្នូ ឆ្នាំ​២០២៣ ។

ឯកឧត្តមឧត្តមសេនីយ៍ឯក សួន សំណាង បានលើក​ឡើង​ពី​សារៈសំខាន់​នៃ​សៀវភៅ​«ស» ការពារ​ជាតិ​ ឆ្នាំ២០២២។ សៀវភៅ «ស» ការពារជាតិឆ្នាំ២០២២ មាន៣ផ្នែក គឺផ្នែកទី១ ទស្សនៈ​ចំពោះ​ការ​អនុវត្តគោលនយោបាយការពារជាតិ។ ពិនិត្យ និងវាយតម្លៃ​លើ​ការ​អនុវត្ត​យុទ្ធសាស្រ្ត​ការពារ​ជាតិ​កន្លងមក។ វិភាគស្ថាន ការណ៍សន្តិសុខដែលជះឥទ្ធិពលមកលើប្រទេសជាតិ។ វាយ​តម្លៃ​ការ​គំរាមកំហែងមកលើសន្តិសុខជាតិ។ កំណត់គោលនយោបាយការពារជាតិ (ឆ្នាំ២០៣០)។ ថែរក្សាសន្តិភាព ការពារផលប្រយោជន៍ជាតិ។ បង្កើន និងពង្រឹង​កិច្ច​សហ​ប្រតិបត្តិការ​អន្តរជាតិ។ លើកតម្កើងគុណតម្លៃនៃប្រវត្តិសាស្ត្រយោធា និងនយោបាយឈ្នះ ឈ្នះ។

ផ្នែកទី២ យុទ្ធសាស្ត្រ និងអាទិភាពនៃកិច្ចការពារជាតិ ក្នុងនោះមាន កិច្ចការពារព្រំដែន, កិច្ច​ការពារ​សន្តិសុខជាតិ, កំណែទម្រង់យោធា, កិច្ចសហប្រតិបត្តិការអន្តរជាតិ និងកិច្ចការពារព្រំដែន, ព្រំ​ដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍន៍, ទំនើបនីយកម្មយោធា (សមត្ថ​ភាព​ទ័ព​ជំនាញ), កសាងតំបន់ប្រវត្តិសាស្ត្រយោធា, ប្រើប្រាស់​យន្តការ​ដែល​មាន​សម្រាប់​ដោះ​ស្រាយ​បញ្ហា​ដោយ​សន្តិវិធីផ្អែកលើច្បាប់ជាតិ និងអន្តរជាតិ, គាំទ្រដល់ដំណើរការ​បោះ​បង្គោល​ព្រំដែន និងចូលរួមអភិវឌ្ឍសហគមន៍តាមព្រំដែន កិច្ចការពារសន្តិសុខជាតិ ជាដើម។ ទី៣ ការ​អនុវត្តផែនការយុទ្ធសាស្ត្រអាទិភាពនៃកិច្ចការពារជាតិ បច្ចេកវិទ្យា និងនវានុវត្តន៍យោធា និង​ថវិ​កា​ការពារ​ជាតិ។

ក្រោយពីស្តាប់នូវការធ្វើបទបង្ហាញរបស់ឯកឧត្តម ឧត្តម សេនីយ៍ឯក សួន សំណាងរួចមក  ឯកឧត្តម កែប ជុតិមា បានកោតសរសើរ និងវាយ​តម្លៃ​ខ្ពស់​ចំពោះ​សមិទ្ធផល​ដែល​ក្រសួង​ការពារ​ជាតិ​សម្រេច​បាន និងថ្លែងអំណរគុណចំពោះកិច្ចសហការដ៏ល្អរវាងក្រសួងការពារជាតិ និង​គណៈកម្មការរដ្ឋសភា ក្នុងអាណត្តិកន្លងមក ហើយឯកឧត្តមសង្ឃឹមថា ក្នុងអាណត្តិថ្មីទី៧នេះ ក្រសួង​ការពារជាតិ នឹងសម្រេចបានលទ្ធផលល្អប្រសើរថែមទៀតជូនជាតិមាតុភូមិ និង​ប្រជាពលរដ្ឋ៕ អត្ថបទ៖ ភារម្យ