ក្រសួងមហាផ្ទៃ កំពុងរៀបចំផែនការយុទ្ធសាស្រ្តច្បាស់លាស់មួយ​សម្រាប់​តម្រង់​ទិស​ដល់​ការ​អនុវត្ត​តួនាទី​របស់ខ្លួនឱ្យកាន់តែមានប្រសិទ្ធភាព ផ្តោតលើទិសដៅជាយុទ្ធសាស្រ្តចំនួន ៦ ដើម្បី​ចូល​រួម​ចំណែកអនុវត្តនូវយុទ្ធសាស្ត្របញ្ចកោណ ដំណាក់កាលទី១ ឱ្យសម្រេច​តាម​គោល​បំណង​រំពឹង​ទុក​។

នេះបើតាមលោកលើកឡើងរបស់ ឯកឧត្តមអភិសន្តិបណ្ឌិត ស សុខា រដ្ឋមន្ត្រីក្រសួងមហាផ្ទៃ បង្ហាញ​ជូនដល់គណៈកម្មការជំនាញទាំង ១០ របស់រដ្ឋសភាដែលដឹកនាំដោយឯកឧត្តម កែប ជុតិមា ប្រធានគណៈកម្មការមហាផ្ទៃ ការពារជាតិ មុខងារសាធារណៈ និងកិច្ច​ការ​ព្រំដែន​នៃ​រដ្ឋសភា (គណៈកម្មការទី៤) នៅសាលសន្និសីទបាយ័ន នាព្រឹកថ្ងៃទី២៨ ខែធ្នូ ឆ្នាំ២០២៣ ។

ឯកឧត្តមបានជម្រាបជូនថា យុទ្ធសាស្ត្រទាំង៦នោះ គឺទី១ ការបន្ត​ថែ​រក្សា​សន្តិភាព​ដោយ​ផ្តោត​លើ​ការ​ពង្រឹង​ស្ថិរភាពនយោបាយសន្តិសុខសណ្តាប់ធ្នាប់សាធារណៈ និងសុវត្ថិភាពសង្គម។ ទី២ ការ​បន្តពង្រឹងស្ថាប័នរដ្ឋបាលថ្នាក់ក្រោមជាតិ ដោយផ្តោតលើការពិនិត្យ និងកែសម្រួលរចនាសម្ព័ន្ធ ប្រព័ន្ធ​គ្រប់គ្រង មុខងារ និងធនធានរបស់រដ្ឋបាលថ្នាក់ក្រោមជាតិ និងការលើកកម្ពស់ ការផ្តល់​សេវា​សាធារណៈ។

ទី៣ ការលើកកម្ពស់ការគ្រប់គ្រងពន្ធនាគារ ដោយផ្តោតលើការពង្រឹងការគ្រប់គ្រង ពន្ធនាគារ​តាម​ស្តង់​ដា​ដែល​ធានាឱ្យមានសន្តិសុខ សុវត្ថិភាព សុខភាព និងមនុស្សធម៌ ការអភិវឌ្ឍ ជំនាញ​វិជ្ជា​ជីវៈ​ដល់​ជន​ជាប់ឃុំ និងការធ្វើសមាហរណកម្មជនដែលត្រូវបានដោះលែងទៅក្នុងសហគមន៍។ ទី៤ ការ​អភិវឌ្ឍស្ថាប័ន និងធនធានមនុស្ស ដោយផ្តោត​លើ​ការ​ធ្វើ​វិចារណកម្ម​មុខ​ងារ​រចនា​សម្ព័ន្ធ​ស្ថាប័ន និងរបៀបរបបធ្វើការងាររបស់អង្គភាពនីមួយៗនៃក្រសួងមហាផ្ទៃ។ ទី៥ ការជំរុញ​ការងារ​បច្ចេក​វិទ្យាឌីជីថល ដោយផ្តោតលើការពង្រឹងការតភ្ជាប់ហេដ្ឋារចនាសម្ព័ន្ធឌីជីថល ការលើក​កម្ពស់​ការ​ស្រាវ​ជ្រាវការអភិវឌ្ឍ និងនវានុវត្តន៍បច្ចេកវិទ្យាឌីជីថល និងទី៦ ការលើក​កម្ពស់​ការ​ផ្តល់​សេវា​សាធារណៈ​ ដោយផ្តោតលើការកែលម្អយន្តការ និងនីតិវិធីនៃ​ការ​ផ្តល់​សេវា​រដ្ឋបាល​ក្នុង​ក្របខណ្ឌ​ក្រសួង​មហាផ្ទៃកា​រពង្រឹង និងការកែលម្អយន្តការនិងនីតិវិធីទទួលដោះស្រាយបណ្ដឹង និងផ្តល់ព័ត៌​មានជូនប្រជាពលរដ្ឋការពង្រឹងប្រសិទ្ធភាព សេវាសុខាភិបាល ក្នុងក្របខណ្ឌក្រសួងមហាផ្ទៃ។

ក្រោយ​ពីបានស្តាប់នៅសេចក្តីរាយការណ៍របស់ឯកឧត្តម ស សុខា រួចមកឯកឧត្តម កែប ជុតិមា បាន​កោតសរសើរ និងវាយតម្លៃខ្ពស់ចំពោះការខិតខំប្រឹងប្រែងរបស់ក្រសួងមហាផ្ទៃ ហើយ​ឯកឧត្តម មានជំនឿជឿជាក់ថា ឯកឧត្តមរដ្ឋមន្ត្រីរដ្ឋមន្រ្តីក្រសួងមហាផ្ទៃ ពិតជា​មាន​សមត្ថភាព​ដឹកនាំ​ក្រសួង​មហា​ផ្ទៃ​ទទួល​បាន​វឌ្ឍនភាព​ថ្មី​ៗ​បន្ថែម​ទៀត​ក្នុង​នាម​ជា​សេនា​ធិការ​របស់​រាជ​រដ្ឋាភិបាល​ ដើម្បីគាំទ្រដល់អាទិភាពគន្លឹះទាំង៥នៃយុទ្ធសាស្រ្តបញ្ចកោណដំណាក់កាលទី១ របស់​រាជ​រដ្ឋាភិបាល៕ ៖ភារម្យ