ភ្នំពេញ៖ ខណ្ឌ៧មករា រាជធានីភ្នំពេញ ព្រឹកថ្ងៃទី២១ ខែមិថុនា ឆ្នាំ២០២១នេះ បានបិទបញ្ចប់យុទ្ធនាការចាក់វ៉ាក់សាំងបង្ការជំងឺកូវីដ-១៩ ប្រភេទស៊ីណូវ៉ាក់ ជូនប្រជាពលរដ្ឋ ទាំង៣មណ្ឌល រួមមានមណ្ឌលចាក់វ៉ាក់សាំងសាលាបឋមសិក្សាបាក់ទូក មានចំនួន២ទីតាំង និងមណ្ឌលចាក់វ៉ាក់សាំងសាលាបឋមសិក្សាសំពៅមាស។
ឯកឧត្តម វេជ្ជបណ្ឌិត តូច យ៉ាន អនុប្រធានប្រតិបតិ្តក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី តំណាងឯកឧត្តម លេង ផាលី ប្រធានប្រតិបតិ្តក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានមានប្រសាសន៍ថា នេះជាថ្ងៃបិទបញ្ចប់យុទ្ធនាការចាក់វ៉ាក់សាំងក្នុងខណ្ឌ៧មករា ដែលមានកម្លាំងក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ចំនួន១៥ក្រុម ស្មើនឹង១៥០រូប បានបំពេញបេសកកម្មចាក់វ៉ាក់សាំងដូសទី២ នៅមណ្ឌលទាំង៣ នៃខណ្ឌ៧មករា ដោយមានកិច្ចសហការជាមួយអាជ្ញាធរមូលដ្ឋាន និងមានលិខិតអញ្ជើញប្រជាពលរដ្ឋមកចាក់វ៉ាក់សាំងតាមវេណ ធ្វើឲ្យដំណើរការចាក់វ៉ាក់សាំងជូនប្រជាពលរដ្ឋមិនមានការកកស្ទះ និងជួបបញ្ហាប្រឈមផ្សេងៗនោះទេ ដោយក្រុមការងារគ្រូពេទ្យទាំងអស់ បានដោះស្រាយជូនបងប្អូនប្រជាពលរដ្ឋបានយ៉ាងល្អប្រសើរ។
ទន្ទឹមគ្នានោះដែរ ព្រះសង្ឃ ប្រជាពលរដ្ឋចាស់ជរា និងយុវជន មកទទួលការចាក់វ៉ាក់សាំងបង្ការជំងឺកូវីដ-១៩ នៅថ្ងៃបិទបញ្ចប់យុទ្ធនាការចាក់វ៉ាក់សាំង នៅក្នុងមណ្ឌលចាក់វ៉ាក់សាំងសាលាបឋមសិក្សាបាក់ទូក និងសាលាបឋមសិក្សាសំពៅមាស បានសម្តែងការគោរពដឹងគុណ និងសូមថ្លែងអំណរគុណចំពោះប្រមុខរាជរដ្ឋាភិបាលកម្ពុជា ក្រសួងសុខាភិបាល និងក្រុមការងារគ្រូពេទ្យជួរទាំងអស់ ដែលបានខិតខំចាក់វ៉ាក់សាំងជូនបងប្អូនប្រជាពលរដ្ឋ ដើម្បីប្រយុទ្ធប្រឆាំង និងជំងឺកូវីដ-១៩។
បើតាមឯកឧត្តម លេង ផាលី ប្រធានប្រតិបតិ្តក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានបញ្ជាក់ថា ស្ថានភាព នៃការចាក់វ៉ាក់សាំងនៅថ្ងៃនេះ ជូនប្រជាពលរដ្ឋនៅខណ្ឌ៧មករា និងខណ្ឌព្រែកព្នៅ រាជធានីភ្នំពេញ និងនៅស្រុកអង្គស្នួល ខេត្តកណ្តាល តាមការឧទ្ទេសនាមរបស់គណៈកម្មការចំពោះកិច្ចចាក់វ៉ាក់សាំងកូវីដ-១៩ ក្របខណ្ឌទូទាំងប្រទេស គឺសម្រាប់ខណ្ឌ/ស្រុកទាំង៣ មានការសហការយ៉ាងល្អ
ជាមួយអាជ្ញាធរមូលដ្ឋាន និងស្ថាប័នពាក់ព័ន្ធ ពិសេសមានការចូលរួមយ៉ាងផុសផុល និងការស្រលាញ់រាប់អានយ៉ាងកកក្តៅពីបងប្អូនប្រជាពលរដ្ឋគួរជាទីរីករាយ និងជាទីមោទនៈសម្រាប់ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ៕ អត្ថបទ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
