សារព័ត៌មាន ញ៉ូវយ៉ក ថាមស៍ (New York Times) ដ៏ល្បីរបស់សហរដ្ឋអាមេរិក កាលពីថ្ងៃពុធ (២៧ ធ្នូ) បានដាក់ពាក្យបណ្តឹងប្រឆាំងនឹងក្រុមហ៊ុនបច្ចេកវិទ្យាប្រាជ្ញាសិប្បនិមិត្ត អូផេន អេអាយ (OpenAI) និងអ្នកគាំទ្រដ៏ធំបំផុតរបស់ខ្លួនគឺក្រុមហ៊ុន ម៉ៃក្រូសូហ្វ (Microsoft) ជុំវិញការចោទប្រកាន់ពីបទរំលោភលើការរក្សាសិទ្ធិ ដោយទាមទារឱ្យក្រុមហ៊ុនទាំងពីរដែលនៅពីក្រោយប្រព័ន្ធសំណួរចម្លើយអេអាយ ឆាតជីភីធី (ChatGPT) ដ៏ពេញនិយម ឈប់ប្រើប្រាស់អត្ថបទរក្សាសិទ្ធិរបស់ខ្លួនដើម្បីបណ្តុះបណ្តាលបច្ចេកវិទ្យាប្រាជ្ញាសិប្បនិម្មិត។

សារព័ត៌មាននេះបានចូលរួមក្នុងរលកនៃការប្រឆាំងកាន់តែខ្លាំងឡើងចំពោះការប្រើប្រាស់ដោយគ្មានការអនុញ្ញាតរបស់ក្រុមហ៊ុនបច្ចេកវិទ្យាអាអាយ នៃការងារដែលបានបោះពុម្ពផ្សាយដើម្បីបណ្តុះបណ្តាលផលិតផលដែលមានមូលដ្ឋានលើប្រព័ន្ធបំលែងមុនការបណ្តុះបណ្តាល (GPT) ជំនាន់ថ្មីរបស់ពួកគេ ដោយបានក្លាយជាសារព័ត៌មានដ៏ធំដំបូងគេរបស់សហរដ្ឋអាមេរិក ដែលដាក់ពាក្យបណ្តឹងបែបនេះ។

នៅក្នុងពាក្យបណ្តឹង ទីភ្នាក់ងារព័ត៌មាននេះបានចោទប្រកាន់ក្រុមហ៊ុន អូផេន អេអាយ និងប្រព័ន្ធគំរូភាសាធំៗ (LLMs) របស់ក្រុមហ៊ុនមៃក្រូសូហ្វ ដែលជំរុញផលិតផលមានមូលដ្ឋានលើប្រព័ន្ធ GPT ដូចជា គំរូអេអាយ ឆាតជីភីធី និងប្រព័ន្ធដាក់បញ្ជូលទិន្នន័យ ខូផាយឡុត (Copilot) ត្រូវបាន «បង្កើតឡើងដោយការចម្លង និងប្រើប្រាស់អត្ថបទព័ត៌មានរក្សាសិទ្ធិរាប់លានច្បាប់របស់សារព័ត៌មាន ញ៉ូវយ៉ក ថាមស៍» ដើម្បីឆ្លើយសំណួររបស់អ្នកប្រើប្រាស់។

ទន្ទឹមនឹងនេះ ការិយាល័យរក្សាសិទ្ធិរបស់សហរដ្ឋអាមេរិក បានចាប់ផ្តើមគំនិតផ្តួចផ្តើមមួយដើម្បីពិនិត្យមើលគោលនយោបាយ និងបញ្ហាដែលលើកឡើងដោយបច្ចេកវិទ្យាប្រាជា្ញសិប្បនិមិត្ត រួមទាំងវិសាលភាពនៃការរក្សាសិទ្ធិក្នុងការងារដែលបង្កើតដោយប្រើឧបករណ៍បច្ចេកវិទ្យាអេអាយ និងការប្រើប្រាស់សម្ភារៈរក្សាសិទ្ធិក្នុងអំឡុងពេលបណ្តុះបណ្តាលអេអាយ៕