គេហទំព័រព័ត៌មាននយោបាយមួយបាននិយាយថា មន្ត្រីអាមេរិក និងសហភាពអឺរ៉ុប កំពុងពិចារណា កែប្រែយុទ្ធសាស្ត្រនៅអ៊ុយក្រែន ដោយកិច្ចពិភាក្សាជាមួយរុស្ស៊ី កំពុងស្ថិតនៅក្នុងចិត្ត។ គេហទំព័រ Politico មានមូលដ្ឋាននៅសហរដ្ឋអាមេរិក បានទម្លាយព័ត៌មានកាលពីថ្ងៃពុធ ដោយបានដកស្រង់សម្តីពីសមាជិករដ្ឋបាល និងអ្នកការទូតអឺរ៉ុប មានមូលដ្ឋាននៅទីក្រុងវ៉ាស៊ីនតោន។ ប្រទេសលោកខាងលិច បាននឹងកំពុងបញ្ជូនជំនួយយោធាទៅឱ្យអ៊ុយក្រែន ដើម្បីជួយប្រទេសនេះដណ្តើមយកទឹកដីទាំងអស់មកវិញ ដែលដណ្តើមយកដោយរុស្ស៊ី។ អត្ថបទរបស់គេហទំព័រ Politico និយាយថា រដ្ឋបាលរបស់លោក Biden និងមន្ត្រីសហភាពអឺរ៉ុប កំពុងផ្លាស់ប្តូរការយកចិត្តទុកដាក់របស់ពួកគេដោយស្ងៀមស្ងាត់ ពីការគាំទ្រគោលដៅនៃជ័យជម្នះទាំងស្រុងរបស់អ៊ុយក្រែន លើប្រទេសរុស្ស៊ី ទៅជាការធ្វើឲ្យប្រសើរឡើងជំហររបស់ខ្លួន នៅក្នុងការចរចាជាយថាហេតុដើម្បីបញ្ចប់សង្រ្គាម។ អត្ថបទនេះ និយាយថា មន្ត្រីសហរដ្ឋអាមេរិក អឺរ៉ុប និងអ៊ុយក្រែន បច្ចុប្បន្នកំពុងពិភាក្សាអំពីការដាក់ពង្រាយកងទ័ពរបស់ទីក្រុងគីវឡើងវិញ ចេញឆ្ងាយពីទីតាំងវាយបក ដើម្បីបង្កើនការការពារប្រឆាំងកងកម្លាំងរុស្ស៊ីនៅភាគខាងកើត។ អត្ថបទព័ត៌មាននិយាយថា ការចរចាជាមួយរុស្ស៊ី ដើម្បីបញ្ចប់ការប្រយុទ្ធ «ទំនងជាមានន័យថា បោះបង់ចោលផ្នែកខ្លះរបស់អ៊ុយក្រែនទៅឲ្យរុស្ស៊ី»។ ប៉ុន្តែគេហទំព័រនេះ បានដកស្រង់សម្តី សមាជិករដ្ឋបាលដោយបញ្ជាក់ថា «មិនទាន់មានផែនការសម្រាប់ការចរចានេះនៅឡើយ»។ ប្រធានាធិបតីអ៊ុយក្រែន លោក Volodymyr Zelenskyy បានបង្ហាញឆន្ទៈរបស់លោក ក្នុងការប្រយុទ្ធរហូតដល់កងទ័ពដណ្តើមបានមកវិញនូវតំបន់ទាំងអស់ដែលត្រូវបានដណ្តើមយកដោយរុស្ស៊ី រួមទាំងនៅតំបន់គ្រីម៉េ ផងដែរ។ រុស្ស៊ី បានដាក់បញ្ចូលឧបសម្ព័ន្ធតំបន់គ្រីម៉េ ជាឯកតោភាគី នៅក្នុងឆ្នាំ ២០១៤។ បណ្តាប្រទេសលោកខាងលិច បានសន្យាម្តងហើយម្តងទៀតនូវការគាំទ្រ មិនផ្លាស់ប្តូរចំពោះអ៊ុយក្រែន។ ប៉ុន្តែអ្នកវិភាគ បានចង្អុលបង្ហាញពីភាពអស់កម្លាំងរបស់ម្ចាស់ជំនួយ។សមាជិកគណបក្សសាធារណរដ្ឋ និងគណបក្សប្រជាធិបតេយ្យ នៅក្នុងសភាសហរដ្ឋអាមេរិក មិនអាច ព្រមព្រៀងគ្នាលើសេចក្តីស្នើច្បាប់ចំណាយបន្ទាន់ ដើម្បីបន្តជំនួយយោធាដល់ប្រទេសអ៊ុយក្រែនឡើយ។