បណ្ដាក្រុមហ៊ុនដឹកជញ្ជូនធំៗ នៅប្រទេសដាណឺម៉ាក និងបារាំង បានប្រកាសពីការចាប់ផ្តើមធ្វើដំណើរឡើងវិញមួយផ្នែកនៃសេវាកម្ម ឆ្លងកាត់តាមសមុទ្រក្រហម។

ក្រុមហ៊ុនដឹកជញ្ជូនអន្តរជាតិជាច្រើន បានសម្រេចផ្អាកការធ្វើដំណើរឆ្លងកាត់សមុទ្រនេះ ដោយសារមានការព្រួយបារម្ភអំពីការវាយប្រហារលើនាវា ពីសំណាក់ក្រុមហ៊ួទីប្រឆាំងរដ្ឋាភិបាលរបស់ប្រទេសយេម៉ែន។ ក្នុងរយៈពេលប៉ុន្មានខែថ្មីៗនេះ ក្រុមនេះបានវាយប្រហារលើនាវាជាច្រើនគ្រឿង ដើម្បីជាការបង្ហាញការរួបរួមជាមួយក្រុមហាម៉ាស នៅតំបន់ហ្កាហ្សា។

ក្រុម A.P. Moller-Maersk របស់ប្រទេសដាណឺម៉ាក កាលពីថ្ងៃពុធ (ទី២៧ ខែធ្នូ) បានចេញផ្សាយកាលវិភាគចុងក្រោយបង្អស់ សម្រាប់នាវាកុងតឺន័ររបស់ខ្លួន ដែលបង្ហាញឲ្យឃើញថា នាវាមួយចំនួននឹងត្រឡប់ទៅធ្វើចរាចរណ៍ក្នុងផ្លូវ ដែលរួមមានទាំងសមុទ្រក្រហម និងព្រែកជីកស៊ុយអេ (Suez Canal)។ ក្រុមហ៊ុននេះ បានលើកឡើងពីប្រតិបត្តិការ ដែលដឹកនាំដោយសហរដ្ឋអាមេរិក ដើម្បីការពារនាវានានា ជាកត្តាក្នុងការសម្រេចចិត្តរបស់ខ្លួន។

នៅមុននេះ រដ្ឋមន្ត្រីការពារជាតិអាមេរិក លោក Lloyd Austin បានប្រកាសពីគំនិតផ្តួចផ្តើមចម្រុះជាតិសាសន៍ ដើម្បីការពារការដឹកជញ្ជូនពាណិជ្ជកម្ម។ លោកបាននិយាយថា គំនិតនោះនឹងនាំឲ្យមានយ៉ាងហោចណាស់ការរួមគ្នា ១០ប្រទេស ដោយក្នុងនោះរួមមានទាំងអង់គ្លេស បារ៉ែន និងកាណាដាផងដែរ។

កាលពីថ្ងៃអង្គារ (ទី២៦ ខែធ្នូ) ក្រុមហ៊ុន CMA CGM របស់បារាំង ក៏បានប្រកាសដែរថា នាវាមួយចំនួនរបស់ខ្លួនបានឆ្លងកាត់សមុទ្រក្រហម។ តែក្រុមហ៊ុនផ្សេងទៀត ដែលរួមមានទាំងក្រុមហ៊ុនប្រេងដ៏ធំរបស់អង់គ្លេស BP ក្រុមហ៊ុនដឹកជញ្ជូនដ៏បំផុត MSC របស់ស្វីស និងក្រុមហ៊ុន Evergreen Marine របស់កោះតៃវ៉ាន់ បន្តប្តូរផ្លូវធ្វើដំណើររបស់នាវាពួកគេដដែល៕