ប្រភពចំនួន២ ដែលដឹងពីគម្រោងការ និងមន្ត្រីអង់គ្លេសម្នាក់ នៅថ្ងៃព្រហស្បតិ៍ (ទី២៨ ខែធ្នូ) បានប្រាប់ថា បណ្ដាមេដឹកនាំនៃក្រុមប្រទេសទាំង៧ ឬG7 នឹងពិភាក្សាគ្នាអំពីគោលការណ៍ច្បាប់ថ្មី ដែលនឹងអនុញ្ញាតឲ្យមានការរឹបអូសទឹកប្រាក់ចំនួន ៣០០ពាន់លានដុល្លារ នៅក្នុងទ្រព្យសកម្មរុស្ស៊ី ដែលត្រូវបានបង្កក នៅពេលដែលបណ្ដាមេដឹកនាំទាំងនោះ ជួបប្រជុំគ្នា ក្នុងខែកុម្ភៈ។

ប្រភពទាំង៣ នោះ បានឲ្យដឹងថា ទាំងមន្ត្រីរបស់សហរដ្ឋអាមេរិក និងចក្រភពអង់គ្លេស បានធ្វើការជាមួយគ្នា ក្នុងរយៈពេលប៉ុន្មានខែថ្មីៗនេះ ដើម្បីចាប់ផ្ដើមជំរុញដល់កិច្ចប្រឹងប្រែង ក្នុងបំណងរឹបអូសទ្រព្យសកម្មរបស់រុស្ស៊ីដែលផ្អឹបទុក នៅប្រទេសបែលហ្ស៊ិក និងទីក្រុងនានា នៅតំបន់អឺរ៉ុប ហើយសង្ឃឹមថា មេដឹកនាំក្រុមប្រទេសទាំង៧ ព្រមព្រៀងចេញសេចក្តីថ្លែងការណ៍ច្បាស់លាស់កាន់តែខ្លាំង នៅពេលដែលពួកគេជួបប្រជុំគ្នា នៅចុងខែកុម្ភៈ ជុំវិញការគម្រប់ខួបលើកទី២ នៃការលុកលុយលើអ៊ុយក្រែនរបស់ទីក្រុងមូស្គូ។

ការពិភាក្សានេះធ្វើឡើង នៅពេលដែលប្រធានាធិបតីអាមេរិកលោក Joe Biden ប្រឈមនឹងការប្រឆាំងពីគណបក្សសាធារណរដ្ឋ ចំពោះសំណើរបស់លោក ដែលស្នើផ្ដល់ជំនួយចំនួន ៦១ពាន់លានដុល្លារបន្ថែមទៀតដល់អ៊ុយក្រែន ដោយក្រុមមន្ត្រីអាមេរិកជាច្រើនរូប បានព្រមានអំពីផលវិបាកធ្ងន់ធ្ងរ សម្រាប់កិច្ចប្រឹងប្រែងក្នុងសង្គ្រាមអ៊ុយក្រែននេះ។

ប្រភពទាំងនោះបានបន្ថែមថា សហរដ្ឋអាមេរិក ដែលគាំទ្រដោយចក្រភពអង់គ្លេស ជប៉ុន និងកាណាដា បានស្នើឲ្យក្រុមការងារ G7 បង្កើតជម្រើសនានា សម្រាប់មេដឹកនាំ G7 ប៉ុន្តែបានព្រមានប្រឆាំងនឹងការរំពឹងទុកពី «ការប្រកាសជាក់ស្តែង» អំពីការរឹបអូសទ្រព្យសម្បត្តិ នៅឯកិច្ចប្រជុំនាចុងខែកុម្ភៈនេះ។

ម្នាក់ក្នុងចំណោមប្រភពនោះ បានប្រាប់ថា គោលការណ៍ច្បាប់ថ្មី នឹងអនុញ្ញាតឲ្យមានការរឹបអូសទ្រព្យសម្បត្តិ ក្នុង «កាលៈទេសៈជាក់លាក់បំផុត» ដែលពាក់ព័ន្ធនឹងប្រទេសលុកលុយ៕