ក្រសួងរតនាគារសហរដ្ឋអាមេរិក បាននិយាយថា ខ្លួនបានកំណត់អត្តសញ្ញាណអង្គភាពហិរញ្ញវត្ថុជាច្រើនដែលទទួលខុសត្រូវក្នុងការសម្របសម្រួលជំនួយហិរញ្ញវត្ថុពីប្រទេសអ៊ីរ៉ង់ដល់ក្រុមឧទ្ទាមហួទី។

ការិយាល័យគ្រប់គ្រងទ្រព្យសម្បត្តិបរទេស(OFAC)របស់ក្រសួងរតនាគារកាលពីថ្ងៃព្រហស្បតិ៍ បានបង្ហាញមនុស្សម្នាក់ និងអង្គភាពចំនួនបី ដែលទទួលខុសត្រូវក្នុងការសម្របសម្រួលជំនួយហិរញ្ញវត្ថុពីប្រទេសអ៊ីរ៉ង់ដល់កងកម្លាំងហួទីដែលសកម្មនៅក្នុងសមុទ្រក្រហម និងឈូងសមុទ្រ Aden ។

សេចក្តីថ្លែងការណ៍របស់ OFAC បានបញ្ចេញឈ្មោះប្រធានសមាគមប្តូររូបិយប័ណ្ណ នៅទីក្រុងសាណា (Sanaa) ប្រទេសយេម៉ែន និងគ្រឹះស្ថានប្តូរប្រាក់ចំនួនបី នៅយេម៉ែន និងទួរគី ទទួលខុសត្រូវក្នុងការជួយផ្ទេរប្រាក់រាប់លានដុល្លារទៅឲ្យក្រុមហួទី តាមការណែនាំរបស់លោក Sa'id al-Jamal ដែលមានទំនាក់ទំនងជាមួយកងកម្លាំង Qods នៃកងឆ្មាំបដិវត្តន៍អ៊ីស្លាម។

ដោយសារការដាក់ទណ្ឌកម្មរបស់ក្រសួងរតនាគារ ទ្រព្យសម្បត្តិ និងផលប្រយោជន៍ទាំងអស់នៅក្នុងទ្រព្យសម្បត្តិរបស់អង្គភាពដែលបានកំណត់ដែលមាននៅក្នុងសហរដ្ឋអាមេរិកឥឡូវនេះ ត្រូវបានរារាំង ហើយត្រូវតែរាយការណ៍ទៅOFAC ។ ការិយាល័យនេះ ក៏បានព្រមានដល់បុគ្គល ឬស្ថាប័នហិរញ្ញវត្ថុណាដែលធ្វើប្រតិបត្តិការមួយចំនួនជាមួយអង្គភាពដែលត្រូវបានទទួលទណ្ឌកម្ម អាចនឹងត្រូវរងការដាក់ទណ្ឌកម្មខ្លួនឯងវិញ។