កងកម្លាំងទ័ពអាកាសរបស់អង្គការណាតូ (NATO) ត្រូវបានបញ្ចេញយ៉ាងប្រញាប់ប្រញាល់ច្រើនជាង ៣០០ដង ក្នុងការឆ្លើយតបទៅនឹងយន្តហោះយោធារុស្ស៊ី ក្នុងឆ្នាំ២០២៣ នេះ។ នេះតាមការឲ្យដឹងពីអង្គការសន្ធិសញ្ញាមួយនេះ នៅថ្ងៃសុក្រ (ទី២៩ ខែធ្នូ) នេះ។

ដោយពីបន្ថែមពីការស្ទាក់ចាប់ ដែលភាគច្រើនបានកើតឡើង នៅសមុទ្របាល់ទិកនោះ អង្គការណាតូបានឲ្យដឹងថា៖ «ភាគច្រើននៃការជួបគ្នានៅលើអាកាស រវាងអង្គការ និងយន្តហោះរុស្ស៊ី គឺមានសុវត្ថិភាព និងប្រកបដោយវិជ្ជាជីវៈ។ ការរំលោភដែនអាកាសរបស់អង្គការណាតូ ដោយយន្តហោះយោធារុស្ស៊ី នៅតែជារឿងកម្រ ហើយជាទូទៅមានរយៈពេលខ្លី»។

បន្ទាប់ពីមានការលុកលុយរបស់រុស្ស៊ីលើអ៊ុយក្រែន កាលពីខែកុម្ភៈ ឆ្នាំមុន អង្គការណាតូបានពង្រឹងយ៉ាងខ្លាំងនូវការការពារដែនអាកាស នៅភាគខាងកើតរបស់ខ្លួនជាមួយនឹងយន្តហោះចម្បាំងបន្ថែមទៀត ការហោះហើរឃ្លាំមើល និងប្រព័ន្ធការការពារដែនអាកាស នៅលើដី។

អ្នកនាំពាក្យរបស់អង្គការណាតូ លោក Dylan White បានឲ្យដឹងនៅក្នុងសេចក្តីថ្លែងការណ៍ថា៖ «យន្តហោះចម្បាំងរបស់អង្គការណាតូ កំពុងបំពេញកាតព្វកិច្ចទាំងយប់ទាំងថ្ងៃ ដោយត្រៀមខ្លួនរួចជាស្រេច ក្នុងការចេញប្រតិបត្តិការយ៉ាងប្រញាប់ប្រញាល់ ក្នុងករណីមានការហោះហើរគួរឲ្យសង្ស័យ ឬមិនបានប្រកាសនៅជិតដែនអាកាសនៃសម្ព័ន្ធមិត្តរបស់យើង»៕