វិមានក្រឹមឡាំង នៅថ្ងៃសុក្រ (ទី២៩ ខែធ្នូ) នេះ បាននិយាយថា ប្រទេសរុស្ស៊ីមានបញ្ជីទ្រព្យសកម្មរបស់លោកខាងលិច ដែលនឹងត្រូវរឹបអូស ប្រសិនបើបណ្ដាមេដឹកនាំនៃក្រុមប្រទេសទាំង៧ ឬG7 សម្រេចអូសយកទ្រព្យសម្បត្តិធនាគារកណ្តាលរុស្ស៊ី ដែលត្រូវបានបង្កកចំនួន ៣០០ពាន់លានដុល្លារ។

មេដឹកនាំ G7 នឹងពិភាក្សាអំពីគោលការណ៍ច្បាប់ថ្មី ដែលនឹងអាចឲ្យមានការរឹបអូសទ្រព្យសម្បត្តិរុស្ស៊ី ដែលត្រូវបានផ្អឹបទុក នៅពេលដែលបណ្ដាមេដឹកនាំទាំងនោះ ជួបគ្នាក្នុងខែកុម្ភៈ។ នេះបើតាមការឲ្យដឹងពីប្រភពចំនួន២ ដែលដឹងពីផែនការនេះ និងមន្ត្រីអង់គ្លេសមួយរូប កាលពីថ្ងៃព្រហស្បតិ៍ (ទី២៨ ខែធ្នូ)។

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា រាល់ទង្វើបែបនេះរបស់បស្ចិមលោក នឹងបំពានច្បាប់អន្តរជាតិ ហើយនឹងធ្វើឲ្យខូចទាំងប្រព័ន្ធហិរញ្ញវត្ថុសកល និងសេដ្ឋកិច្ចពិភពលោក។

លោក Peskov បានប្រាប់អ្នកសារព័ត៌មានថា រុស្ស៊ីបានសិក្សាពីជំហានសងសឹក ដែលអាចនឹងមាន។ នៅពេលសួរថា តើមានបញ្ជីទ្រព្យសកម្ម ដែលរុស្ស៊ីអាចរឹបអូសបានដែរ ឬទេ លោក Peskov បានឆ្លើយថា «មាន»។ តែលោកបានបដិសេធមិនប្រាប់លម្អិតអំពីទ្រព្យសម្បត្តិអ្វី ដែលមានក្នុងបញ្ជីនោះ។

បច្ចុប្បន្នទ្រព្យសកម្មរបស់ធនាគារកណ្តាលរុស្ស៊ីប្រហែល ៣០០ពាន់លានដុល្លារ ត្រូវបានបង្កកនៅប្រទេសលោកខាងលិច។ ទោះបីជាធនាគារកណ្តាលមិនបានរៀបរាប់លម្អិតថា ទ្រព្យសកម្មណាមួយ ត្រូវបានបិទការធ្វើចរាចរណ៍ក៏ដោយ ក៏ភាគច្រើននៃមូលបត្របំណុល និងប្រាក់បញ្ញើ ត្រូវបានបង្ហាញជាប្រាក់អឺរ៉ូ ក៏ដូចជាដុល្លារអាមេរិក និងប្រាក់ផោនអង់គ្លេសមួយចំនួនដែរ៕