កណ្ដាល ៖ ​ឯកឧត្តម លឹម គានហោ​ រដ្ឋមន្ត្រីក្រសួង​ធនធានទឹក និង​ឧតុនិយម​​ និង​ក្រុមការងារ​បច្ចេកទេស​របស់​ក្រសួង​ នៅ​​ថ្ងៃទី១៣​ ខែតុលា ឆ្នាំ២០២០ នេះ បាន​ចុះ​ពិនិត្យ ​និង​បញ្ជា​ការងារ​អន្តរាគមន៍​ផ្ទាល់​ នៅលើ​បណ្ដោយ​ខ្នង​ទំនប់​សណ្តរ ស្ទឹង​ព្រែក​ត្នោត ដែល​​កំពុង​ប្រឈម​ដោយ​ជំនន់​ទឹកស្ទឹង​ព្រែក​ត្នោត​ ក្នុង ភូមិសាស្ត្រ​ភាគ​ខាងលិច​រាជធានី​ភ្នំពេញ ​និង​ខេត្តកណ្តាល ។

សូម​បញ្ជាក់ថា ​ស្ថានភាព​ទឹក​នៅ​ទ្វារ ទំនប់ អាងទឹក ​៧​មករា ព្រឹក​នេះ​ទឹក មាន​កម្ពស់ 8,80 ម៉ែត្រ ធៀប​នឹង ថ្ងៃម្សិលមិញ​មានការ​កើនឡើង ​0,45​ម៉ែត្រ​បន្ថែម លើស​កម្ពស់​ឲ្យ ​មានការ ប្រុងប្រយ័ត្ន 7​ម៉ែត្រ ធ្វើ​ឲ្យ​កម្ពស់​ទឹក​ក្នុង​ស្ទឹងឡើង​​ជិត​ស្មើនឹង​ខ្នង​ទំនប់​នៅ​តាម​ទី​ទំនាប​មួយចំនួន ។ ពេលនេះ​ក្រុមការងារ​បច្ចេក​ទេសរ​បស់​ក្រសួង បាននិង​កំពុង​ខិតខំ​ជួសជុល​បិត​រូង​នាគ​ដែល​បាន​លេចចេញ​ជា​បន្តបន្ទាប់ ​ដោយ​ប្រើប្រាស់​គ្រឿងចក្រ​កាយ​ដី​លើក និង​បង្ហាប់​ទំនប់ ​ព្រមទាំង​ច្រក​បាវ​ខ្សាច់​ទប់​លើកកម្ពស់​ខ្នង​ទំនប់ ​និង​ជា​ការ​ចូលរួម​បន្ថែម​របស់​ក្រសួង​ធនធានទឹក ​និង​ឧតុនិយម ​ឯកឧត្តម​រដ្ឋមន្ត្រី​ បាន​ឧបត្ថម្ភ​សំបកបាវ​ចំនួន ​3000 បាវ ជូន​ដល់ ​លោកស្រី គឹម ញឹម ​អភិបាល​ខណ្ឌដង្កោ ចាត់​ចែង​បន្ត ​ទៅ សង្កាត់​ទាំង 03 ដើម្បី​ចូលរួម​ទប់ស្កាត់​លំហូរ​ទឹក​លើ​តួ​ទំនប់​ទៅ​ផ្នែក​ខាងក្រោម​បង្ក​ការ​លិច​លង់​ដល់​លំនៅឋាន​ប្រជាពលរដ្ឋ ។

ចាប់តាំងពី​ថ្ងៃទី​០៥ ខែតុលា ឆ្នាំ​២០២០ រហូតមកដល់​ពេលនេះ ក្រុមការងារ​បច្ចេកទេស​ក្រសួង​ធនធាន​ទឹក បាន ប្រើ​ប្រាស់ គ្រឿង ចក្រ ធុនធ្ងន់ ចំនួន ២៧​គ្រឿង​ និង​កម្លាំង​ពលកម្ម​ប្រចាំការ​24​ម៉ោង ​និង​ជាពិសេស​តាំងពី​យប់​ម្សិល​មិញ​ រហូត​ដល់​វេលា​ថ្ងៃ​ត្រង់នេះ​ ក្រុមការងារ​របស់​ក្រសួង​បាន​ខិតខំ​អន្តរាគមន៍​រហូត​គ្រប់គ្រង​សភាពការណ៍​ស្ថានភាព​ទឹកជំនន់​ដែល​កំពុង​យាយី​បាន​ទាំងស្រុង​មកវិញ ។

ជាមួយ គ្នា នេះ នាពេល​ដ៏​ខ្លី​ខាង​មុន​ក្រសួង​ធនធានទឹក ​និង​ឧតុនិយម នឹង​ចាប់​ផ្តើម​អនុវត្ត​គម្រោង​ប្រព័ន្ធ​ស្រោចស្រព និង​ការពារ​ទឹកជំនន់​ស្ទឹង​ព្រែក​ត្នោត ​រាជធានី​ភ្នំពេញ ​ខេត្តកណ្តាល​ និង​ខេត្តតាកែវ ​ដែល​ទទួល​បាន​ជំនួយ​ហិរញ្ញប្បទាន​ពី​សាធារណរដ្ឋ​ប្រជាមានិត​ចិន៕