ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃអាទិត្យ (៣១ ធ្នូ) នេះថាប្រទេសកូរ៉េខាងជើង បាន​ប្តេជ្ញាថានឹងបាញ់បង្ហោះផ្កាយរណបចារកម្មថ្មីចំនួនបីគ្រឿង បង្កើតយានដ្រូនយោធា និង​បង្កើន​ឃ្លាំង​អាវុធនុយក្លេអ៊ែររបស់ខ្លួននៅឆ្នាំ២០២៤ ខណៈដែលមេដឹកនាំ លោក គីម ជុងអ៊ុន បាន​និយាយ​ថា គោលនយោបាយរបស់សហរដ្ឋអាមេរិក កំពុងធ្វើឱ្យមានសង្រ្គាមដែលជៀសមិនរួច។

លោក គីម បានរិះគន់យ៉ាងខ្លាំងលើទីក្រុងវ៉ាស៊ីនតោន នៅក្នុងការលើកឡើងដ៏វែងមួយ ដែល​បិទ​បញ្ចប់​កិច្ច​ប្រជុំរបស់គណបក្សកាន់អំណាចរយៈពេលប្រាំថ្ងៃ ដែលកំណត់គោលដៅសេដ្ឋកិច្ច យោធា និងគោលនយោបាយការបរទេសសម្រាប់ឆ្នាំខាងមុខនេះ។ យោង​តាម​ទីភ្នាក់​ងារ​សារ​ព័ត៌មាន​រដ្ឋ KCNA លោកគីម បាននិយាយថា «ដោយសារតែ​ជំហាន​មិន​ប្រុង​ប្រយ័ត្ន​របស់​សត្រូវ​ ដើម្បី​ឈ្លាន​ពានយើង វាគឺជាកា​រសម្រេ​ច​បាន​ថា​សង្រ្គាម​អាច​ផ្ទុះឡើ​ង​នៅ​ពេល​ណាក៏​បាន​នៅ​លើ​ឧបទ្វីប​កូរ៉េ»។

លោកបានបញ្ជាឲ្យយោធារៀបចំការពារ «សន្តិភាពទឹកដីកូរ៉េខាងត្បូងទាំងមូល» រួមទាំង​ការ​ទម្លាក់​គ្រាប់​បែកនុយក្លេអ៊ែរប្រសិនបើចាំបាច់ ដើម្បីឆ្លើយតបនឹងការវាយប្រហារណាមួយ។ សុន្ទរកថារបស់លោក គីម បានធ្វើឡើងនៅមុនឆ្នាំ២០២៤ ដែលនឹង​ឃើញ​ការ​បោះឆ្នោត​ដ៏​សំខាន់​ទាំង​នៅ​ក្នុងប្រទេសកូរ៉េខាងត្បូង និងសហរដ្ឋអាមេរិក។

ក្រុមអ្នកជំនាញ​ព្យាករណ៍ថា ប្រទេសកូរ៉េខាងជើង នឹងរក្សាយុទ្ធនាការ​ នៃ​សម្ពាធ​យោធា​ដើម្បី​ព្យាយាម​បង្កើន​ឥទ្ធិពលណាមួយជុំវិញការបោះឆ្នោតប្រធានាធិបតីអាមេរិកក្នុងខែវិច្ឆិកា ដែល​អាច​ឃើញ​ការ​វិលត្រឡប់មកកាន់តំណែងវិញរបស់អតីតប្រធានាធិបតីអាមេរិក លោក ដូណាល់ ត្រាំ (Donald Trump) ដែលបានប្រើប្រាស់ទាំងការគំរាមកំហែង និងការ​ទូតជាប្រវត្តិសាស្ត្រ​ជាមួយ​មេ​ដឹក​នាំកូរ៉េខាងជើងរូបនេះ៕