មនុស្សរាប់រយនាក់បានប្រមូលផ្ដុំគ្នាតវ៉ានៅ «ទីលានចតុរង្គចំណាប់ថ្នូរ» នៅទីក្រុង តែលអាវីវ (Tel Aviv) របស់អ៊ីស្រាអែល កាលពីថ្ងៃសៅរ៍ (៣០ ធ្នូ) ដោយ​អំពាវនាវ​ឱ្យ​រដ្ឋាភិបាល​អ៊ីស្រាអែល ធានាការដោះលែងចំណាប់ថ្នូរដែលនៅសល់។ អ្នកតវ៉ាបាននិយាយថា «យើង​ខ្លាច​ថា​រដ្ឋាភិបាល​អ៊ីស្រាអែល បានផ្តល់អាទិភាពលើមហិច្ឆតានយោបាយរបស់ខ្លួន ហើយបញ្ហា​ចំណាប់​ថ្នូរ​គឺ​មិនស្ថិតនៅលើអាទិភាពចម្បងនោះទេ»។

ការតវ៉ានេះបានកើតឡើងនៅជាប់នឹងអគារក្រសួងការពារជាតិអ៊ីស្រាអែល ជាទី​ដែល​នាយករដ្ឋ​មន្ត្រី​របស់​ប្រទេសនេះ លោក បេនចាមីន ណេតាន់យ៉ាហ៊ូ (Benjamin Netanyahu) បាន​ធ្វើ​សន្និសីទ​សារព័ត៌មាន។

លោកណេតាន់យ៉ាហ៊ូ បាននិយាយថា អ៊ីស្រាអែល​ត្រូវ​តែ​គ្រប់​គ្រង​ពេញ​លេញ​នៃ​ច្រក​របៀង​ព្រំដែន ហ្កាហ្សាស្រ្ទីប ជាមួយអេហ្ស៊ីប ដើម្បីធានាឱ្យមាន «ការគ្មានយោធា» នៃតំបន់នេះ ខណៈ​ដែល​យោធាអ៊ីស្រាអែល បានសម្រុករុញច្រានកាន់តែជ្រៅទៅក្នុងភាគកណ្តាល និងភាគ​ខាងត្បូង​នៃ​តំបន់​ហ្កាហ្សា។

ស្ទើរតែអ្នកស្រុកនៅហ្កាហ្សាទាំងអស់ដែលមានចំនួន ២,៣លាននាក់ ត្រូវបាន​បង្ខំ​ឱ្យ​ចាក​ចេញ​ពី​លំនៅ​ឋាន​របស់ពួកគេដោយការវាយលុករយៈពេល ១២សប្តាហ៍របស់អ៊ីស្រាអែល ដែល​បង្ក​ឡើង​បន្ទាប់​ពី​ក្រុមហាម៉ាស និងក្រុមសម្ព័ន្ធមិត្តបានសម្លាប់មនុស្ស ១.២០០នាក់ និងចាប់​ចំណាប់​ថ្នូរ​ចំនួន ២៤០នាក់នៅក្នុងការវាយលុកនៅភាគខាងត្បូងអ៊ីស្រាអែល កាលពីថ្ងៃទី០៧ ខែតុលា មក​៕