ក្រសួងការពារជាតិស៊ីរី បាននិយាយនៅក្នុងសេចក្តីថ្លែងការណ៍មួយថា អ៊ីស្រាអែល បាន​កំណត់​គោលដៅ​លើ​ទីតាំងយោធាអ៊ីរ៉ង់ នៅក្នុង​ទីក្រុង​អាឡិបប៉ូ​(Aleppo) របស់​ប្រទេសស៊ីរី​ជាមួយ​នឹង​ការ​វាយ​ប្រហារតាមអាកាស។

ក្រសួងការពារជាតិ បានឲ្យដឹងទៀតថា៖«អ៊ីស្រាអែល បានអនុវត្ត​ការ​ឈ្លាន​ពាន​តាម​អាកាស​ពី​ទិស​ដៅ​នៃ​សមុទ្រមេឌីទែរ៉ាណេ ភាគខាងលិចនៃទីក្រុងឡាតាគៀ (Latakia) ដោយផ្តោត​លើ​ចំណុច​មួយ​ចំនួននៅភាគខាងត្បូងនៃទីក្រុងអាឡិបប៉ូ»។

ក្រុមឃ្លាំមើលសិទ្ធិមនុស្សស៊ីរី បាននិយាយថា យុទ្ធជនគាំទ្រអ៊ីរ៉ង់ ១៩នាក់ រួមទាំងជនជាតិស៊ីរី ៤នាក់ និងអ៊ីរ៉ាក់៦ នាក់ ត្រូវបានសម្លាប់ និង ១៨នាក់ បានរងរបួសនៅ​ក្នុង​ការ​វាយ​ប្រហារ​តាម​អាកាស​យ៉ាង​ហោចណាស់៩លើក។ ក្រុមឃ្លាំមើលនេះ បានបន្ថែមថា ការវាយប្រហារ បាន​កំណត់​គោល​ដៅទីតាំងយោធា ការដឹកជញ្ជូនអាវុធពីអ៊ីរ៉ាក់ និងឃ្លាំងស្តុកគ្រាប់រំសេវ។

អ៊ីស្រាអែល​កម្រ​ធ្វើអត្ថាធិប្បាយលើការវាយប្រហារបុគ្គលសំដៅទៅលើប្រទេសស៊ីរី ប៉ុន្តែ​បាន​និយាយ​ម្តង​ហើយម្តងទៀតថា ខ្លួននឹងមិនអនុញ្ញាតឲ្យអ៊ីរ៉ង់ ដែលគាំទ្រ​រដ្ឋាភិបាល​រប​ស់​ប្រធានា​ធិបតី​ស៊ីរី លោក បាសា អាល់អាសាដ (Bashar al-Assad) ពង្រីកវត្តមានរបស់ខ្លួន នៅ​ទី​នោះ​ឡើយ​។ អ្នកនាំពាក្យយោធាអ៊ីស្រាអែល បានបដិសេធមិនធ្វើអត្ថាធិប្បាយទេ៕