ឆ្នាំ២០២៣ កន្លងផុត ឈានចូលដល់ ឆ្នាំ ២០២៤ ជាឆ្នាំសកលបានចូលមកដល់។ ថ្ងៃ​ដំបូង​នៃ​ឆ្នាំ​ថ្មី​នេះប្រជាពលរដ្ឋ លើកឡើងថា ពួកគេចង់ឱ្យសង្គមជាតិនៅតែមានសុខសន្តិភាពដូចសព្វថ្ងៃ និង​មាន​ការរីកចម្រើនជាបន្តបន្ទាប់។

ព្រឹត្តិការណ៍ឆ្លងឆ្នាំ២០២៣ ចូលឆ្នាំ ២០២៤ បានបិទបញ្ចប់ទៅដោយភាពសប្បាយរីករាយ គ្រប់​ទិស​តំបន់​នៅកម្ពុជា។ ចូលមកដល់ថ្ងៃដំបូង ឆ្នាំ ២០២៤ ជាថ្ងៃឈប់សម្រាកនេះ ប្រជាពលរដ្ឋ​មួយ​ចំនួន ដែលពុំបានចេញទៅកម្សាន្តទៅតាមបណ្ដាខេត្ត បានមក​កម្សាន្ត​លំហែរ​ជា​លក្ខណៈ​គ្រួសារ​នៅ​ចំណុច​មាត់ទន្លេ និងមុខព្រះបរមរាជវាំង។ ក្នុងការចាប់ផ្ដើមឆ្នាំថ្មីនេះ ពួកគេ​ចង់​ឃើញ​កម្ពុជា​ កាន់តែរីកចម្រើនទៅមុខ មានអ្នកវិនិយោគមកម្ពុជាកាន់តែច្រើន។

 លើស​ពី​ការចង់បានឱ្យសង្គមជាតិមានការរីកចម្រើន ពួកគេចង់ឱ្យប្រទេសមួយនេះ នៅតែមាន​សុខ​សន្តិភាព​ជា​ដរាប និងចង់ឱ្យប្រជាពលរដ្ឋគ្រប់រូបមានភាពសុខសាន្ត។ ពួក​គេ​លើក​ឡើង​បន្ថែម​ថា គ្រប់ពលរដ្ឋទាំងអស់ មានភារកិច្ចត្រូវថែរក្សា សុខសន្តិភាព និងអ្វីដែល​កម្ពុជា​មាន​សព្វ​ថ្ងៃ​ឱ្យ​បាន​គង់វង្ស។

ពាក្យថា សន្តិភាព សម្រាប់ប្រជាពលរដ្ឋកម្ពុជា គឺមានន័យធំធេងបំផុត ពិសេសពលរដ្ឋ​វ័យ​ចំណាស់ ​ដែលធ្លាប់ឆ្លងកាត់ ភាពលំបាក ការបែកបាក់ ដោយសារ​សង្គ្រាម​ជា​ច្រើន​សិប​ឆ្នាំ​កន្លង​ផុត​ទៅ។​ សម្រាប់កម្ពុជា សន្តិភាព ពេញលេញទើបមានរយៈពេល ២៥ឆ្នាំប៉ុណ្ណោះ ទោះបីជា​របប​ប្រល័យ​ពូជសាសន៍ខ្មែរក្រហម បានបិទបញ្ចប់ទៅតាំងពីថ្ងៃទី ៧មករា ឆ្នាំ ១៩៧៩ក្ដី។ ការ​បែកបាក់ សង្គ្រាមផ្ទៃក្នុង ការផ្ទុះអាវុធរវាងខ្មែរ និងខ្មែរ នៅតែបន្តមាននៅតំបន់មួយចំនួន ដោយ​អូស​បន្លាយរហូតខែ ធ្នូ ឆ្នាំ ១៩៩៨ ទើបការអនុវត្តនយោបាយឈ្នះឈ្នះ របស់សម្ដេចតេជោ ហ៊ុន សែន ទទួលបានជោគជ័យ ធ្វើឱ្យគ្រប់ភាគីជម្លោះទាំងអស់ បោះបង់ការប្រយុទ្ធ ធ្វើ​សមាហរណ​កម្ម​រួម​រស់ជាមួយរាជរដ្ឋាភិបាលដល់បច្ចុប្បន្ន៕ អត្ថបទ៖គឹម ហុក