សិប្បករខ្មែរជាច្រើន ដែលលក់ដូរផលិតផល នៅក្នុងពិធីអបអរសាទខួបលើកទី ២៥ និង​ខួប​លើក​ទី៥​ នៃការកសាងវិមានឈ្នះ-ឈ្នះ បានបង្ហាញនូវការសប្បាយរីករាយ ដោយទទួលបានការគាំទ្រ និង​លក់ដូរដាច់យ៉ាងខ្លាំង ជាពិសេសនៅថ្ងៃចុងក្រោយ ត្រូវនឹងថ្ងៃឆ្លងឆ្នាំសកល ឆ្នាំ២០២៣ ឈាន​ចូល ឆ្នាំ ២០២៤ ខណៈដែលប្រជាពលរដ្ឋបានចូលរួមយ៉ាងច្រើនកុះករ។

សិប្បករលក់ដូរផលិតផលខ្មែរ និងជាម្ចាស់សិប្បកម្មកែច្នៃ និង​វេច​ខ្ចប់​ចំណី​អាហារ​ក្នុង​ស្រុក​លើក​ឡើង​ក្នុង​កិច្ចសម្ភាសន៍ជាមួយ BTV ថា សកម្មភាពកែច្នៃ និងវេចខ្ចប់ចំណីអាហារ មាន​ការ​មមា​ញឹក​កាន់​តែ​ខ្លាំង ជាពិសេសនៅក្នុងព្រឹត្តិការណ៍ខួបលើកទី ២៥ និងខួបលើកទី៥ នៃការ​កសាង​វិមាន​ឈ្នះ-ឈ្នះ ក៏ដូចជាការចូលរួមពិធីអបអរសាទបុណ្យចូលឆ្នាំសកល ពួកគាត់បាន​ត្រៀម​ផលិត​ និងវេចខ្ចប់ផលិតផលជាច្រើន ដើម្បីយកមកពិព័រណ៍ និងដាក់​លក់​នៅ​ក្នុង​ព្រឹត្តិការណ៍​ដ៏​ធំ​នេះផ​ង​ដែរ។

សិប្បករទាំងនោះ លើកឡើងស្រដៀងគ្នាទៀតថា ទាក់ទិនការលក់ផលិតផលក្នុងរយៈពេលបីថ្ងៃ ជាពិសេសនៅថ្ងៃចុងក្រោយ នៅវិមានឈ្នះ-ឈ្នះ នេះ ខណៈដែល​ប្រជាពលរដ្ឋ​បាន​ចូល​រួម​យ៉ាង​ច្រើន​កុះករ ពួកគាត់បានលក់ដាច់យ៉ាងខ្លាំង និងបានចំណូលច្រើនគួរសម។ តាមសកម្មភាពនេះ, ក្រុមសិប្បករទាំងនោះ រំពឹងថា នៅថ្ងៃខាងមុខ ផលិតផលរបស់ពួកគាត់ ដែលផលិត និងវេចខ្ចប់ ដែល​​ជា​សហគ្រិនក្នុងស្រុក មានការគាំទ្រ ហូរចូលទីផ្សារកាន់តែច្រើន និង​លក់​ដូរ​ដាច់​កាន់​តែ​ខ្លាំង​។

សូមបញ្ជាក់ថា ក្នុងពិធីអបអរសាទខួបលើកទី២៥ នៃការបញ្ចប់សង្គ្រាមស៊ីវិលនៅកម្ពុជា និង​ការ​អនុវត្ត​ប្រកប​ដោយ​ជោគជ័យ នយោ បាយឈ្នះ-ឈ្នះ និងខួបលើកទី៥ នៃការកសាងវិមានឈ្នះ-ឈ្នះ នៅវិមានឈ្នះ-ឈ្នះ មានស្តង់ចំនួន ៥០០ របស់ក្រសួងស្ថាប័នរដ្ឋ និងឯកជនបានចូលរួម តាំង​ពិព័រណ៍ ក្នុងនោះសម្រាប់ស្តង់ គណៈកម្មាធិការជាតិជំរុញចលនាភូមិ១ផលិតផល១ មាន​ចំនួន ៨០ស្តង់ ដាក់តាំងបង្ហាញ និងលក់ផលិតផលជាច្រើនប្រភេទខុសៗគ្នា ជាពិសេស​ការ​ដាក់​លក់​ផលិត​ចំណី​អាហារ ភេសជ្ជៈ និងវត្ថុអនុស្សាវរីយ៍ ជាដើម៕ អត្ថបទ៖ សុន រ៉ាឌី