ខណៈពិធីឆ្លងឆ្នាំថ្មីឆ្នាំសកល ២០២៤ ត្រូវបានបញ្ចប់ដោយភាពសប្បាយរីករាយ ក្រុម​អាជីវករ​លក់​ដូរ​ផ្នែក​ម្ហូបអាហារ បានឲ្យដឹងប្រហាក់ប្រហែលគ្នាថា គ្រប់មុខទំនិញបានលក់ដាច់អស់ច្រើន បើ​ធៀប​ទៅនឹងថ្ងៃធម្មតាកើនឡើងប្រហែល ៥០%។

ផ្ដល់សម្ភាសន៍ផ្ទាល់ដល់ទូរទស្សន៍ព័ត៌មាន ប៊ីធីវី នៅព្រឹកថ្ងៃទី១ ខែមករា ឆ្នាំ២០២៤នេះ ក្រុម​អាជីករ​ផ្សារ​ឈូកមាស និងផ្សារីករាយ ស្ថិតក្នុងខណ្ឌសែនសុខ រាជធានីភ្នំពេញ បានលើកឡើងថា ដោយ​សារពិធីឆ្លងឆ្នាំសកល និងមានការជួបជុំក្រុមគ្រួសារ សាច់ញាតិ ធ្វើឲ្យ​ការ​លក់​ដូរ​កាក់​កប​គួរ​សម និងលក់ដាច់អស់លឿនជាងថ្ងៃធម្មតាដែលមិនមែនបុណ្យទាន។ ពួកគាត់បាននិយាយស្រដៀងគ្នាទៀតថា ការលក់ដាច់នេះ ក៏ដោយ​សារ​ប្រទេស​ជាតិ​មាន​សុខសន្តិភាព ទើបធ្វើឲ្យមានការរៀបចំកម្មវិធីនានាជាបន្តបន្ទាប់ និងមានការជួបជុំក្រុមគ្រួសារ មិត្តភ័ក្តិ និងសាច់ញាតិជិតឆ្ងាយប្រកបដោយភាពសប្បាយរីករាយ។

ក្រុមអាជីករផ្សារ សង្ឃឹមថា នៅឆ្នាំ២០២៤នេះ ការប្រកបមុខរបររកស៊ី នឹង​កាន់​តែ​កាក់​កប​ជាង​ពេល​មុន​ៗ ខណៈជំងឺកូវីដ១៩ មានភាពល្អប្រសើរច្រើន និងសង្ឃឹមទៀតថា ឆ្នាំថ្មីនេះនឹង​នាំ​មក​នូវ​ភាព​សម្បូរសប្បាយ រុងរឿង ជាពិសេសការដឹកនាំរបស់រាជរដ្ឋាភិបាលកម្ពុជាអាណត្តិទី៧ នៃ​រដ្ឋសភា ធ្វើឲ្យប្រទេសជាតិកាន់តែរីកចម្រើន និង​រក្សា​និរន្តរភាព​នៃ​ការ​អភិវឌ្ឍ​សេដ្ឋកិច្ច​រយៈ​ពេល​វែ​ង​ជា​មួយនឹងកំណែទម្រង់កាន់តែស៊ីជម្រៅ៕ អត្ថបទ៖ ឈិត បូរ៉ាវី