អ៊ីរ៉ង់៖ ប្រធានាធិបតីជាប់ឆ្នោតអ៊ីរ៉ង់បាននិយាយកាលពីថ្ងៃចន្ទថា លោកនឹងមិនជួបប្រធានាធិបតីអាមេរិកលោក Joe Biden ទេ ហើយក៏មិនចរចាអំពីកម្មវិធីមីស៊ីលបាលីស្ទីករបស់ទីក្រុងតេអេរ៉ង់ និងការគាំទ្ររបស់ខ្លួនដល់កងជីវពលក្នុងតំបន់ ដោយប្រកាន់ភ្ជាប់នូវជំហរម៉ឺងម៉ាត់នេះ ក្រោយជ័យជម្នះច្រើនលើសលុបក្នុងការបោះឆ្នោតកាលពីសប្តាហ៍មុន។
ប្រធានតុលាការ លោក Ebrahim Raisi ក៏បានហៅខ្លួនលោកថា ជាអ្នកការពារសិទ្ធិមនុស្សផងដែរ នៅពេលត្រូវបានសួរអំពីការចូលរួមរបស់លោក ក្នុងការសម្លាប់រង្គាលមនុស្សប្រមាណ ៥០០០នាក់កាលពីឆ្នាំ១៩៨៨។ គេបានកត់សម្គាល់ថា នេះជាលើកដំបូងដែលលោកត្រូវបានគេដាក់ឱ្យនិយាយ ក្នុងកម្មវិធីផ្សាយផ្ទាល់លើកញ្ចក់ទូរទស្សន៍អំពីពេលវេលាដ៏ខ្មៅងងឹត ក្នុងប្រវត្តិសាស្ត្រអ៊ីរ៉ង់នៅចុងបញ្ចប់នៃសង្គ្រាមអ៊ីរ៉ង់-អ៊ីរ៉ាក់។
លោក Raisi បានថ្លែងនៅក្នុងសន្និសីទសារព័ត៌មានថា សហរដ្ឋអាមេរិកមានកាតព្វកិច្ចដកទណ្ឌកម្មទាំងអស់ប្រឆាំងនឹងអ៊ីរ៉ង់។ នៅពេលត្រូវបានសួរអំពីកម្មវិធីមីស៊ីលបាលីស្ទីករបស់អ៊ីរ៉ង់ និងការគាំទ្រដល់កងជីវពលក្នុងតំបន់ លោក Raisi បានពណ៌នាអំពីបញ្ហានេះថា មិនអាចចរចាបាន។ សេតវិមានមិនបានឆ្លើយតបភ្លាមៗ ទៅនឹងសេចក្ដីថ្លែងការណ៍របស់លោកប្រធានាធិបតីថ្មី Raisi កាលពីថ្ងៃចន្ទទេ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
