ពោធិ៍សាត់៖ អាជ្ញាធរ​ស្រុកតាលោសែនជ័យ​សហការ​ជាមួយ​សហភាព​សហព័ន្ធ​យុវជន​កម្ពុជា​ ស្រុក បានរៀបចំព្រឹត្តិការណ៍ឆ្លងឆ្នាំសកល ឆ្នាំ២០២៣ ឈានចូល ឆ្នាំ២០២៤ ជា​លើក​ដំបូង​ហើយ​សម្រាប់​ស្រុក​មួយ​នេះ ដែល​មានរយៈពេល១យប់២ថ្ងៃ គឺចាប់ពីថ្ងៃទី៣០-៣១ ខែធ្នូ ឆ្នាំ​២០២៣ ដែលបានប្រារព្ធធ្វើនៅបឹងព្រះពន្លៃ ស្ថិត ក្នុងភូមិផ្ទះរុង ឃុំផ្ទះរុង ស្រុក​តាលោ​សែនជ័យ ខេត្តពោធិ៍សាត់ ដោយ​មាន​កីឡាករ និង​កីឡាការនី​រត់​ប្រណាំង​ជិត​៤០០​នាក់​ជុំវិញ​បឹង​ព្រះពន្លៃ​ចម្ងាយ​ ១០​គីឡូម៉ែត្រ និងបោះតង់​ក្រោមប្រធានបទ «រួមគ្នា​អភិរក្ស​ជីវៈ​ចម្រុះ​និងកិ​ច្ច​ការពារ​បរិស្ថាន​ធម្មជាតិបឹងព្រះពន្លៃដើម្បីទេសចរណ៍»។

លោក សំ ណារិទ្ធ អភិបាលស្រុកតាលោសែនជ័យមានបានអោយដឹងថា នេះគឺ​ជា​លើក​ទី១​ដែល​រដ្ឋបាល​ស្រុក​សហការ​ជាមួយ​សហភា​ព​សហព័ន្ធ​យុវជន​កម្ពុជា​ស្រុក​ និង​អាជ្ញាធរ​មូលដ្ឋាន​ និង​បាន​ការ​ចូលរួមជួយឧបត្ថម្ភទាំងសម្ភារៈនិងថវិកា ពីសប្បុរសជននៅក្នុងមូលដ្ឋាន បាន​រៀប​ចំ​ពិធី​នេះ​ឡើង​ដើម្បី​ឆ្លងឆ្នាំសកល២០២៣ឈានចូល២០២៤ និងអបអរសាទរ​ខួប​លើក​ទី​៤៥ ទិវា​ជ័យ​ជម្នះ ៧មករា១៩៧៩-៧មករា ២០២៤ ។ ព្រឹត្តិការណ៍នេះ មានកម្មវិធីសំខាន់ៗជាច្រើនដូច ការ​រត់ប្រណាំងជុំវិញបឹងព្រះពន្លៃចម្ងាយ១០គីឡូម៉ែត្រ បោះតង់ អាហារសាមគ្គី បង្ហោះគោម ដុត​កាំជ្រូច និង​រាំលរងកំសាន្តនៅតាមមាត់បឹង ក្រោមប្រធានបទ « រួមគ្នាអភិរក្សជីវៈចម្រុះ និង​កិច្ច​ការពារ​បរិស្ថានធម្មជាតិ បឹងព្រះពន្លៃ ដើម្បីទេសចរណ៍» ។

លោកបានបញ្ជាក់ថា គោល​បំណង​សំខាន់​ដែល​នាំ​ឱ្យ​មាន​ព្រឹត្តិការណ៍​នេះ​ដើម្បី​ជំរុញ​អោយ​មាន​កំណើន​ទេសចរណ៍ មកកម្សាន្ត និងមកសិក្សាស្វែងយល់ពីតំបន់អភិរក្សបឹងព្រះពន្លៃ ដែលជា​បឹ​ង​ធម្មជាតិ​សម្បូរ​ទៅដោយធនធានធម្មជាតិ និងជីវៈ​ចម្រុះ​យ៉ាង​ច្រើន។​ ហើយ​កំណើន​ភ្ញៀវទេសចរ​ នឹង​ជួយ​លើក​ស្ទួយ​ដល់​សេដ្ឋកិច្ច​ប្រជាពលរដ្ឋ​នៅ​ក្នុង​មូលដ្ឋាន​ស្រុក​តាលោក​សែន​ជ័យ​បន្ថែម​ទៀត។

លោកអះអាងថា ចំពោះការដើរកំសាន្តលក្ខណៈគ្រួសារក្តី ជាក្រុមៗក្តី ទៅកាន់​តំបន់​បឹង​ធម្មជាតិ​បឹង​ព្រះពន្លៃ​នា​ពេលនេះ ពាក់ព័ន្ធសន្តិសុខសុវត្ថិភាព គឺមិនមានការព្រួយបារម្មណ័ឡើយ ដោយសារ​តែ​មានអាជ្ញាធរ សមត្ថកិច្ចដែនដី ពួកគាត់មានការទទួលខុសត្រូវខ្ពស់ ដូច្នេះ ការ​បោះតង់​សម្រាក​លំហែកាយ និងទទួលទានអាហារនៅក្នុងតំបន់នោះមានអ្វីភ័យខ្លាចឡើយ។ លោក បន្តទៀតថា នៅទីនេះ យើងមានសេវាកម្មល្អប្រកបដោយផាសុខភាព និងបាន​គយ​គុន​ទេសភាព​ជុំវិញ​បឹងព្រមទាំងស្ថានភាព ជីវភាពនិងដំណាំកសិកម្ម និងដំណាំកសិឧស្សាហកម្ម​របស់​ប្រជាកសិករនៅជំវិញបឹងនោះថែមទៀតផង៕ អត្ថបទ៖ ពៅ ភីរុណ