ប្រធានាធិបតីអ៊ុយក្រែន លោក វ៉ូឡូមៀ ហ្សេឡិនស្គី (Volodymyr Zelensky) បាននិយាយនៅក្នុងសុន្ទរកថាវីដេអូល្ងាចរបស់ខ្លួនកាលពីថ្ងៃទី ៣០ ខែធ្នូថា រុស្ស៊ីនឹងត្រូវទទួលខុសត្រូវចំពោះរាល់ការវាយប្រហារលើទីក្រុងនានារបស់អ៊ុយក្រែន

លោកបាននិយាយថា៖«សម្រាប់រាល់យានដ្រូន Shahed និងរាល់មីស៊ីលរបស់រុស្ស៊ី នឹងមានការទទួលខុសត្រូវដោយត្រឹមត្រូវរបស់រដ្ឋភេរវកម្មទាំងផ្នែកនយោបាយ និងផ្នែកប្រតិបត្តិ»។

លោកហ្សេឡិនស្គី បានថ្លែងថា អ៊ុយក្រែន កំពុងរៀបចំផលិតអាវុធបន្ថែមទៀត នៅឆ្នាំ ២០២៤។

អភិបាលក្រុង Kharkov លោក Ihor Terekhov បានរាយការណ៍ថា កងកម្លាំងរុស្ស៊ី បានវាយប្រហារកណ្តាលទីក្រុង Kharkov កាលពីថ្ងៃទី៣០ ខែធ្នូ បណ្តាលឲ្យមនុស្ស២០នាក់ រងរបួស។

ទីក្រុងនេះ ត្រូវបានវាយប្រហារដោយមីស៊ីលយ៉ាងតិច ៦គ្រាប់ ដែលក្នុងនោះមួយគ្រាប់ បានវាយប្រហារអគារលំនៅដ្ឋានមួយ ដោយបណ្តាលឲ្យមានអគ្គិភ័យឆេះយ៉ាងសន្ធោសន្ធៅ។

ការវាយប្រហារនេះ កើតឡើងមួយថ្ងៃ បន្ទាប់ពីរុស្ស៊ី បានធ្វើការវាយប្រហារតាមអាកាសដ៏ធំបំផុតលើអ៊ុយក្រែន។