អ៊ីស្រាអែលបានព្រមានថា សង្រ្គាមរបស់ខ្លួនប្រឆាំងនឹងក្រុមហាម៉ាស នឹងបន្តមានពេញមួយឆ្នាំ២០២៤ ខណៈដែលការវាយប្រហារឥតឈប់ឈរ បានសម្លាប់មនុស្សរាប់សិប នាក់នៅហ្កាហ្សា ហើយក្រុមសកម្មប្រយុទ្ធប៉ាឡេស្ទីន បានបាញ់រ៉ុក្កែត នៅពាក់កណ្តាលអធ្រាត្រ (ថ្ងៃទី១ ខែមករា)។

អ្នកនាំពាក្យយោធាអ៊ីស្រាអែល លោក Daniel Hagari បាននិយាយនៅក្នុងសារឆ្នាំថ្មីថា ទាហានបម្រុងចំនួន ៣០០.០០០នាក់ នឹងទទួលបានការសម្រាកពីសង្រ្គាម ដើម្បីត្រៀមខ្លួនសម្រាប់ «ការប្រយុទ្ធដ៏យូរអង្វែង» នាពេលខាងមុខ។ លោក Hagari បាននិយាយថា កងទ័ព «ត្រូវតែរៀបចំផែនការទុកជាមុន ដោយយល់ថា យើងនឹងត្រូវតម្រូវឲ្យធ្វើភារកិច្ចបន្ថែម និងសង្រ្គាមពេញមួយឆ្នាំនេះ» ខណៈដែលជម្លោះដែលបង្កឡើងដោយការវាយប្រហាររបស់ពួកហាម៉ាសកាលពីថ្ងៃទី៧ ខែតុលា បានផ្ទុះឡើង។

មន្ត្រីក្រសួងសុខាភិបាល នៅទីនោះ បាននិយាយថា ការបាញ់កាំភ្លើងធំម្តងទៀត បានវាយប្រហារតំបន់ហ្កាហ្សា ដែលគ្រប់គ្រងដោយក្រុមហាម៉ាស ដោយបានសម្លាប់មនុស្សយ៉ាងហោចណាស់ ២៤នាក់ ដោយមានការវាយប្រហារ ត្រូវបានរាយការណ៍នៅទូទាំងតំបន់។

សង្គ្រាមដ៏បង្ហូរឈាមបំផុតមិនធ្លាប់មាន នៅតំបន់ហ្កាហ្សានេះ ត្រូវបានបង្កឡើងដោយការវាយប្រហារកាលពីថ្ងៃទី៧ ខែតុលារបស់ក្រុមហាម៉ាសលើអ៊ីស្រាអែល ដែលបណ្តាលឲ្យមនុស្សស្លាប់ប្រហែល ១.១៤០នាក់ ដោយភាគច្រើនជាជនស៊ីវិល។ នេះបើយោងតាមការបូកសរុបរបស់សារព័ទ៌មាន AFP ដោយផ្អែកលើតួលេខផ្លូវការ។

លើសពីនោះទៀត ក្រុមសកម្មប្រយុទ្ធក៏បានចាប់មនុស្សប្រហែល ២៥០នាក់ ជាចំណាប់ថ្នូរនៅថ្ងៃនោះផងដែរ ដែលច្រើនជាងពាក់កណ្តាលនៃពួកគេ នៅតែស្ថិតក្នុងតំបន់ហ្កាហ្សានៅឡើយ។ នេះបើយោងតាមមន្ត្រីអ៊ីស្រាអែល។ អ៊ីស្រាអែលបានប្តេជ្ញាកម្ទេចក្រុមហាម៉ាស ហើយបានចាប់ផ្តើមការវាយលុកយ៉ាងខ្លាំងក្លាយ ដែលបានធ្វើឲ្យតំបន់ហ្កាហ្សាដ៏ធំត្រូវបំផ្លាញខ្ទេចខ្ទី និងបានសម្លាប់មនុស្សយ៉ាងហោចណាស់ ២១,៨២២ នាក់ ដែលភាគច្រើនជាស្ត្រី និងកុមារ៕