បាល់បោះ៖ ការប្រកួតកីឡាបាល់បោះជ្រើសរើសជើងឯកលើវិញ្ញាសា ៣នាក់ទល់នឹង ៣នាក់ ដែលគ្រោងរៀបចំការប្រកួតក្នុងឆ្នាំ២០២១ នេះត្រូវបានលើកពេលទៅឆ្នាំ២០២២ ហើយ។ នេះបើតាមការបញ្ជាក់របស់លោក ដួង ឌីម អគ្គលេខាធិការងសហព័ន្ធកីឡាបាល់បោះកម្ពុជានៅថ្ងៃទី២២ ខែមិថុនា ឆ្នាំ២០២១ នេះ។
លោក ដួង ឌីម បានបញ្ជាក់ថា ការប្រកួតជើងឯកបាល់បោះ ៣នាក់ទល់នឹង ៣នាក់នេះ ដំបូងឡើយសហព័ន្ធគ្រោងរៀបចំក្នុងឆ្នាំ២០២១ ប៉ុន្តែដោយសារវិបត្តិកូវីដ-១៩ សហព័ន្ធក៏បានស្នើពន្យារពេលរៀបចំព្រឹត្តិការណ៍ថ្មីនេះទៅឆ្នាំ២០២២ វិញ។ តែកាលបរិច្ឆេទប្រកួតនៅមិនទាន់កំណើតនោះទេ ដ្បិតសហព័ន្ធរង់ចាំមើលសមត្ថភាពជាក់ស្ដែង នៃជំងឺរាតត្បាតជាសកលកូវីដ-១៩ ជាមុនសិន។ អគ្គលេខាធិការសហព័ន្ធដដែលបន្ដថា ការរៀបចំផែនការប្រកួតបាល់បោះវិញ្ញាសា ៣នាក់ទល់នឹង ៣នាក់នេះគឺជាវិញ្ញាសាថ្មី ដែលកម្ពុជាពុំសូវមានការប្រកួតពីមុន តែដើម្បីលើកទឹកចិត្តដល់ក្រុមដែលមានសមាជិកតិច សហព័ន្ធក៏សម្រេចជ្រើសរើសយកវិញ្ញាសានេះ រៀបចំការប្រកួតជើងឯកមួយទៀតបន្ថែមលើវិញ្ញាសា ៥នាក់ទល់នឹង ៥នាក់ ដែលសហព័ន្ធធ្លាប់បានរៀបចំរៀងរាល់ឆ្នាំ។
ម្យ៉ាងវិញទៀត តាមរយៈការរៀបចំការប្រកួតវិញ្ញាសាថ្មីនេះ ក៏ជាឱកាសល្អក្នុងការពង្រឹងសមត្ថភាពរបស់ក្រុម ពិសេសវាស់ស្ទង់កម្រិតបច្ចេកទេសរបស់កីឡាករម្នាក់ៗ ដើម្បីទាញយកបទពិសោធន៍សម្រាប់ធ្វើជាដើមទុន ត្រៀមធ្វើម្ចាស់ផ្ទះការប្រកួតកីឡាស៊ីហ្គេមលើកទី៣២ នាឆ្នាំ២០២៣ នៅកម្ពុជាផងដែរ។ នេះបើតាមការបញ្ជាក់បន្ថែមរបស់លោក ដួង ឌីម អគ្គលេខាធិការងសហព័ន្ធកីឡាបាល់បោះកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
