បរិស្ថានអនាម័យ និងរបៀបរៀបរយសាធារណៈ នៅសួនច្បារមាត់ទន្លេ ត្រូវបានគិតគូររៀបចំសម្អាតបានស្អាតល្អប្រសើរ ពីអាជ្ញាធរមូលដ្ឋាន ក្រោយការដើរលេងកម្សាន្តរបស់ប្រជាពលរដ្ឋក្នុងថ្ងៃឆ្លងឆ្នាំសកល ២០២៤ ។
លោក ម៉ៅ ពោធិ៍ ប្រធានកម្លាំងសណ្តាប់ធ្នាប់ប្រចាំគោលដៅសួនមាត់ទន្លេ បានប្រាប់ BTV ឱ្យដឹងថា រយៈពេល២យប់៣ថ្ងៃមកនេះ ដោយគិតចាប់ពីថ្ងៃទី៣១ ធ្នូ នៃឆ្នាំ២០២៣ ដល់ព្រឹកថ្ងៃទី០២ ខែមករា ឆ្នាំ២០២៤នេះ ក្រុមការងារសណ្តាប់ធ្នាប់ បានបន្តសកម្មភាពការងារ ក្នុងការសម្អាតអនាម័យជានិច្ច ដោយបានបាញ់លាងសម្អាតកន្លែងដែលមានការដក់ទឹកកង្វក់នៅលើសួនច្បារ និងសហការជាមួយផ្នែកបរិស្ថាន ក្នុងការដើរប្រមូលសំរាមនានាតាមទីធ្លាសួនច្បារជាដើម។
ពលរដ្ឋមើលឃើញពីការរៀបចំបានស្អាតពីក្រុមការងារអាជ្ញាធរ បានបង្ហាញការយល់ឃើញថា ថ្វីត្បិតរយៈពេល០២យប់នេះ មានមនុស្សម្នាមកលេងកម្សាន្តដោយបានចោល និងបន្សល់សំរាមយ៉ាងច្រើនក៏ពិតមែន ប៉ុន្តែក្រោយចប់កម្មវិធីភ្លាម សួនច្បារគឺវិលមកភាពមានអនាម័យល្អប្រសើរឡើងវិញ មិនមានបន្សល់ជាក្លិនស្អុយឆ្អេះឆ្អាបនោះឡើយ ។ ហើយនៅព្រឹកថ្ងៃទី០២ មករា នេះ ពលរដ្ឋបានដើរលេងកម្សាន្តដោយអារម្មណ៍ស្រស់ស្អាតបំផុតផងដែរ។
សូមបញ្ជាក់ថា អាជ្ញាធរខណ្ឌដូនពេញ តែងដាក់វេនក្រុមការងារប្រចាំការ ក្នុងការចុះបាញ់លាងសម្អាតបរិស្ថានអនាម័យនៅសួនច្បារមាត់ទន្លេជាប្រចាំ មិនចាំទាល់តែមានពិធីបុណ្យទាន និងបុណ្យជាតិសម្ខាន់ៗទើបមានការសម្អាតនោះទេ ។ ហើយកិច្ចការងារសម្អាតនេះ ត្រូវបានពលរដ្ឋមើលឃើញ និងបង្ហាញភាពសាទរជានិច្ចចំពោះសកម្មភាពគិតគូរយកចិត្តទុកដាក់លើការងារបរិស្ថានសង្គមមួយនេះ៕ អត្ថបទ៖ លីហេង
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
