ភ្នំពេញ ៖ សាកលវិទ្យាល័យភូមិន្ទវិចិត្រសិល្បៈ នៃក្រសួងវប្បធម៌ និងវិចិត្រសិល្បៈ ឈរលើគោលការណ៍៣ ដើម្បីបណ្តុះបណ្តាលធនធានមនុស្ស គឺគុណភាព-សមត្ថភាព និងសីលធម៌ ឲ្យក្លាយជាមូលធនមនុស្សសម្រាប់សង្គមជាតិ។

​ការថ្លែងរបស់ឯកឧត្តមសាស្រ្តាចារ្យ ហេង សុផាឌី សាកលវិទ្យាធិការ នៃសាកលវិទ្យាល័យភូមិន្ទវិចិត្រសិល្បៈ យ៉ាងដូច្នេះ ក្នុងពិធីបើកបវេសនកាលសម្រាប់និសិ្សតថ្នាក់ឆ្នាំសិក្សាមូលដ្ឋាន ឆ្នាំសិក្សាថ្មី២០២៣-២០២៤ នៅបរិវេណទីតាំងទី២ សាកលវិទ្យាល័យភូមិន្ទវិចិត្រសិល្បៈ ស្ថិតក្នុងសង្កាត់ព្រែកលៀប ខណ្ឌជ្រោយចង្វារ ដែលជាសមិទ្ធផលថ្មីស្រឡាងសម្រាប់ប្អូនៗនិសិ្សតសិក្សា ក្នុងឆ្នាំសិក្សា២០២៣-២០២៤​ នាព្រឹកថ្ងៃទី០២ ខែមករា ឆ្នាំ២០២៤ នេះ។

ឯកឧត្តមសាស្រ្តាចារ្យ សាកលវិទ្យាធិការ បានបន្តថា តាមរយៈការធ្វើតេស្តកាលពីថ្ងៃទី១២ ខែធ្នូ ឆ្នាំ២០២៣កន្លងទៅ លើជំនាញទាំង៥ បានបង្ហាញថាប្អូនៗនិសិ្សតពិតជាមានទេពកោសល្យ អាចបន្តវេណលើចំណេះជំនាញ ចំណេះដឹង ចំណេះគិត ចំណេះធ្វើ ព្រមទាំងការពេញចិត្ត ការស្រលាញ់លើកេរ្តិ៍ដំណែលដូនតា ហើយប្អូនៗនិសិ្សត បានចូលរួមវិនិយោគ យុវភាពក្នុងវិស័យវប្បធម៌។ សិល្បៈវប្បធម៌ ដែលជាទេពកោល្យ និងជាពហុជំនាញ ជាមូលដ្ឋានគ្រឹះ នៃអត្តសញ្ញាណជាតិ ដែលយើងទាំងអស់គ្នាត្រូវតែចូលរួមលើកស្ទួយអំពីគុណតម្លៃដូនតា និងគុណតម្លៃជាតិ ព្រោះវាជាមូលធន ដ៏សំខាន់សម្រាប់បច្ចុប្បន្ន ក៏ដូចជាទៅអនាគត។

នាឱកាសបើកបវេសនកាលលើទីតាំងថ្មីនេះ ឯកឧត្តមសាស្រ្តាចារ្យ ហេង សុផាឌី បានចាត់ទុកថាប្អូនៗនិស្សិត ជាអ្នកមានសំណាង ព្រោះថ្ងៃនេះប្អូនៗនិសិ្សត បានមកកាន់ទីតាំងថ្មីមុនគេ និងរៀនសូត្រនៅនេះមុនគេ ក្លាយជានិស្សិតច្បង សម្រាប់និសិ្សតចូលមកសិក្សានៅទីតាំងនេះ បន្តបន្ទាប់ទៀត ហើយប្អូនៗនិសិ្សត ជាអ្នកបើកប្រវតិ្តសាស្រ្ត សម្រាប់អគារថ្មីនេះផងដែរ។ ជាមួយគ្នានេះ និសិ្សតបង់ថ្លៃចូលសិក្សា មានចំនួន៤៧៧នាក់ នារី២៣២នាក់, និសិ្សតអាហារូបករណ៍ ១៥៥នាក់ នារី៧៧នាក់ សរុបទាំងអស់៦៣២នាក់ នារី៣០៩នាក់៕ អត្ថបទ៖ រដ្ឋា