ភ្លៀងធ្លាក់ខ្លាំងបានបង្កជាទឹកជំនន់យ៉ាគំហុកនៅទូទាំងផ្នែកខ្លះនៃភាគខាងកើតនៃប្រទេសអូស្ត្រាលី នៅថ្ងៃអង្គារ (២ មករា) នេះខណៈដែលប្រព័ន្ធអាកាសធាតុធ្ងន់ធ្ងរបានបណ្ដាលឲ្យទឹកជន់លិចផ្លូវថ្នល់ កាត់ផ្តាច់ផ្លូវក្នុងទីក្រុង និងទ្រព្យសម្បត្តិរងការខូចខាត ដោយក្រុមអាជ្ញាធរបានជំរុញឱ្យអ្នកស្រុកនៅតំបន់ទំនាបពិចារណាផ្លាស់ទៅទីទួលខ្ពស់។

ភាគឦសាននៃរដ្ឋ ញ៉ូវសៅវែលស៍ (New South Wales) និងរដ្ឋឃីនស៍ឡែន (Queensland) ភាគអាគ្នេយ៍ត្រូវបានវាយលុកដោយប្រព័ន្ធអាកាសធាតុមិនអំណោយផលពេញមួយយប់ ដោយទីក្រុងជាច្រើនមានភ្លៀងធ្លាក់យ៉ាងខ្លាំង។

ជាមួយគ្នានេះ ព្យុះផ្គររន្ទះដ៏ខ្លាំងក្លាមួយកំពុងរំកិលឆ្លងកាត់រដ្ឋ វីកតូរៀ (Victoria) របស់អូស្រា្តលី ដោយបានធ្វើឱ្យដើមឈើដួលរលំ និងធ្វើឱ្យបណ្តាញអគ្គិសនីនៃអ្នកប្រើប្រាស់អគ្គិសនីចំនួន ២០.០០០គ្រួសារត្រូវបានកាត់ផ្ដាច់ ។ លំនៅឋាន និងអាជីវកម្មក្នុងរដ្ឋ វីកតូរៀ រាប់ម៉ឺនកន្លែងបានបាត់បង់ថាមពលអគ្គិសនីប្រើប្រាស់ ដោយសារព្យុះផ្គររន្ទះបានបោកបក់ពាសពេញរដ្ឋ។

ក្រុមអ្នកជំនាញនិយាយថា បម្រែបម្រួលអាកាសធាតុបានបង្កើនព្រឹត្តិការណ៍អាកាសធាតុធ្ងន់ធ្ងរក្នុងប្រទេសអូស្ត្រាលីក្នុងរយៈពេលប៉ុន្មានឆ្នាំចុងក្រោយនេះ។ បាតុភូតអាកាសធាតុ អ៊ែលនីញ៉ូ ដែលអាចបង្កជាចំហេះព្រៃ ព្យុះស៊ីក្លូន និងគ្រោះរាំងស្ងួតយូរអង្វែង ក៏កំពុងជះឥទ្ធិពលដល់ប្រទេសនេះក្នុងកំឡុងរដូវក្តៅខែធ្នូ ដល់ខែកុម្ភៈឆ្នាំថ្មីនេះផងដែរ៕