កាលវិភាគរបស់ក្រុមហ៊ុនដែលបានចេញផ្សាយកាលពីយប់ថ្ងៃចន្ទ បានបង្ហាញថា ក្រុមហ៊ុនដឹកជញ្ជូន Maersk របស់ប្រទេសដាណឺម៉ាក នៅតែគ្រោងនឹងបើកនាវាដឹកកុងតឺន័រជាង ៣០ គ្រឿងឆ្លងកាត់ព្រែកជីកស៊ុយអេ (Suez)និងសមុទ្រក្រហមក្នុងពេលខាងមុខ ទោះបីជាមានការវាយប្រហារនៅចុងសប្តាហ៍លើនាវារបស់ខ្លួននៅក្នុងតំបន់ក្តី។

ប៉ុន្តែក្រុមហ៊ុន Maersk ក៏បានដាក់ផែនការផ្អាកសម្រាប់នាវាមួយចំនួន ដើម្បីប្រើប្រាស់ផ្លូវសមុទ្រក្រហមចំពេលមានហានិភ័យនៃការវាយប្រហាររបស់ក្រុមសកម្មប្រយុទ្ធហួទីនៅប្រទេសយេម៉ែន ដោយនិយាយថា ខ្លួននឹងប្រកាសពីការធ្វើដំណើរសម្រាប់នាវានីមួយៗ នៅពេលក្រោយ។

ក្រុមហ៊ុននេះ កាលពីថ្ងៃអាទិត្យ បានផ្អាកបើកនាវាឆ្លងកាត់សមុទ្រក្រហមទាំងអស់អស់រយៈពេល ៤៨ ម៉ោង បន្ទាប់ពីមានការប៉ុនប៉ងពីក្រុមហួទីដែលគាំទ្រដោយអ៊ីរ៉ង់ ដើម្បីវាយប្រហារលើនាវា Maersk Hangzhou របស់ខ្លួន ទោះបីជាឧទ្ធម្ភាគចក្រយោធារបស់សហរដ្ឋអាមេរិក នៅទីបំផុត បានវាយបកទៅលើការវាយប្រហារនោះ និងសម្លាប់ជនសកម្មប្រយុទ្ធចំនួន ១០នាក់ក៏ដោយ។

ក្រុមហួទី ដែលគ្រប់គ្រងផ្នែកខ្លះនៃប្រទេសយេម៉ែន បន្ទាប់ពីសង្គ្រាមជាច្រើនឆ្នាំ នៅក្នុងខែវិច្ឆិកា បានចាប់ផ្តើមវាយប្រហារលើនាវាអន្តរជាតិ ដែលឆ្លងកាត់សមុទ្រក្រហម ដោយនិយាយថា វាជាការឆ្លើយតបទៅនឹងការវាយប្រហាររបស់អ៊ីស្រាអែលលើតំបន់ហ្កាហ្សាស្ទ្រីប ដែលគ្រប់គ្រងដោយក្រុមហាម៉ាស។

ក្រុមដឹកជញ្ជូនធំៗ រួមទាំងក្រុមហ៊ុនកុងតឺន័រយក្ស Maersk និង Hapag-Lloyd បានឈប់ប្រើប្រាស់ផ្លូវសមុទ្រក្រហម និងព្រែកជីកអ៊ុយអេ ដោយផ្លាស់ប្តូរទិសដៅទៅកាន់ការធ្វើដំណើរដ៏វែងឆ្ងាយជុំវិញទ្វីបអាហ្រ្វិកតាមរយៈច្រកឆ្នេរសមុទ្រ Cape of Good Hope។