នគរបាលហូឡង់កាលពីថ្ងៃចន្ទ (០១ មករា) បាននិយាយថាមនុស្សជាង ២០០នាក់ ត្រូវបានចាប់ខ្លួននៅថ្ងៃចូលឆ្នាំសកលក្នុងអំឡុងពេលកុបកម្មនៅទូទាំងប្រទេស ដែលក្នុងនោះមន្រ្តីនគរបាលរាប់សិបនាក់បានរងរបួស។

នគរបាលនៅក្នុងទីក្រុងជាច្រើនត្រូវបានវាយប្រហារដោយកាំជ្រួចទុកសម្រាប់អុជចូលឆ្នាំថ្មី និងដុំថ្ម នៅក្នុងអ្វីដែលអ្នកនាំពាក្យបានប្រាប់ទូរទស្សន៍ NOS ថាគឺជាយប់នៃឧប្បត្តិហេតុដ៏ធ្ងន់ធ្ងរ និងអំពើហឹង្សា «មិនអាចទទួលយកបាន»។

នគរបាលនៅទីក្រុង រ៉ូតតើដាំ (Rotterdam) បាននិយាយថា រថយន្តជាង ១០០គ្រឿងនិងយានជំនិះផ្សេងទៀតត្រូវបានដុតនៅទីនោះ ខណៈដែលនៅរដ្ឋធានីអាំស្ទែដាំ (Amsterdam) ទីក្រុងឡាអេ និងទីក្រុងដទៃទៀត ត្រូវការក្រុមបង្រ្កាបកុបកម្មដើម្បីបំបែកហ្វូងមនុស្សដ៏ហិង្សា។

ក្រុមបង្រ្កាបកុបកម្ម ត្រូវបានប្រតិបត្តិការនៅទូទាំងប្រទេសដើម្បីជួយដល់កងពន្លត់អគ្គិភ័យដែលត្រូវបានវាយប្រហារដោយកាំជ្រួច ខណៈពេលដែលពួកគេព្យាយាមពន្លត់ភ្លើងជាច្រើនកន្លែង។

នគរបាលបាននិយាយថា នៅក្នុងទីក្រុងហាអាលែម (Haarlem) បុរសអាយុ ១៩ឆ្នាំម្នាក់បានស្លាប់ ដោយសាររបួសដែលលោកទទួលរងនៅក្នុងឧប្បត្តិហេតុមួយជាមួយនឹងការបាញ់កាំជ្រួច នៅភ្លាមៗមុនពេលពាក់កណ្តាលអធ្រាត្រក្នុងថ្ងៃអាទិត្យ៕