មហាសេដ្ឋីហុងកុង លោក Jimmy Lai ដែលជាអ្នកគាំទ្រលទ្ធិប្រជាធិបតេយ្យមួយរូប នៅថ្ងៃអង្គារ (ទី២ ខែមករា) បានផ្ដល់ចម្លើយពីភាពគ្មានទោសពៃរ៍ ចំពោះការចោទប្រកាន់ទាំងអស់ ដែលបានធ្វើឡើងប្រឆាំងនឹងរូបលោក ក្នុងរឿងក្ដីសន្តិសុខជាតិដ៏លេចធ្លោ។

លោក Lai ប្រឈមនឹងបទចោទចំនួន ២ករណី ក្នុងការឃុបឃិតជាមួយកងកម្លាំងបរទេស ក្នុងនោះរួមទាំងការអំពាវនាវឲ្យមានការដាក់ទណ្ឌកម្មប្រឆាំងនឹងមន្ត្រីហុងកុង និងចិន ក្រោមច្បាប់សន្តិសុខជាតិ ដែលដាក់ចេញដោយប្រទេសចិន ដែលទោសនេះអាចឲ្យរូបលោកត្រូវជាប់ពន្ធនាគារអស់មួយជីវិត។ លោក Lai វ័យ ៧៦ឆ្នាំ ស្ថាបនិកសារព័ត៌មានគាំទ្រលទ្ធិប្រជាធិបតេយ្យ Apple Daily ដែលពេលនេះ បានឈប់ដំណើរការហើយនោះ ក៏ត្រូវបានចោទប្រកាន់ពីបទសមគំនិត ក្នុងការបោះពុម្ភផ្សាយបំផុសគំនិតបះបោរ ក្រោមច្បាប់បះបោរ ក្នុងសម័យអាណានិគមផងដែរ។ លោក Lai បាននិយាយជាភាសាអង់គ្លេស សម្រាប់ការចោទប្រកាន់នីមួយៗចំនួន ៣ករណីថា «មិនមានទោសកំហុសនោះទេ»។

ដំបូងឡើយ លោក Lai ត្រូវបានចោទប្រកាន់មួយកររណីពីបទ «សមគំនិតក្នុងការផលិតការបោះពុម្ពផ្សាយបែបបំបះបំបោរ» ចំនួន ២ករណីពីបទ «ការសមគំនិតក្នុងការឃុបឃិតជាមួយកងកម្លាំងបរទេស ដើម្បីបង្កគ្រោះថ្នាក់ដល់សន្តិសុខជាតិ» និងមួយករណីពីបទ «ឃុបឃិតគ្នា»។ បទល្មើស ២ចុងក្រោយនេះ ត្រូវផ្ដន្ទាទោសជាប់ពន្ធនាគារអស់មួយជីវិត ក្រោមច្បាប់សន្តិសុខ ដែលក្រុងប៉េកាំង បានដាក់ចេញក្នុងឆ្នាំ២០២០ ដើម្បីទប់ស្កាត់ការប្រឆាំង បន្ទាប់ពីមានការតវ៉ាបែបលទ្ធិប្រជាធិបតេយ្យដ៏ធំ កាលពីឆ្នាំមុន។ រដ្ឋអាជ្ញា នៅថ្ងៃអង្គារនេះ បានប្រាប់តុលាការថា ពួកគេនឹងមិនបន្តការចោទប្រកាន់បទ «ឃុបឃិតគ្នា» ដាច់ដោយឡែកនោះទេ ព្រោះនេះជាផ្នែកមួយនៃការចោទប្រកាន់បទ «សមគំនិតឃុបឃិត» ចំពោះលោក Lai។

ការចោទប្រកាន់នានា ដែលថា លោក Lai បានឃុបឃិតជាមួយជនបរទេស បានធ្វើឲ្យកាន់តែមានភាពតានតឹងនៅក្នុងប្រព័ន្ធផ្សព្វផ្សាយរដ្ឋ ក្នុងឆ្នាំ២០១៩ បន្ទាប់ពីលោកបានជួបជាមួយអតីតអនុប្រធានាធិបតីលោក Mike Pence និងអតីតរដ្ឋមន្ត្រីការបរទេស លោក Mike Pompeo របស់សហរដ្ឋអាមេរិក។ បណ្ដាប្រទេសកាន់លទ្ធិប្រជាធិបតេយ្យលោកខាងលិច ក្នុងនោះរួមទាំងសហរដ្ឋអាមេរិក អង់គ្លេស និងសហភាពអឺរ៉ុប កំពុងឃ្លាំមើលយ៉ាងដិតដល់ ដោយសវនាការនឹងលេចចេញជាចំណុចសំខាន់នៃការទូតថ្មី និងការសាកល្បងដ៏សំខាន់ សម្រាប់ឯករាជ្យភាព និងសេរីភាពរបស់តុលាការក្រុងហុងកុង ក្រោមច្បាប់សន្តិសុខជាតិដ៏ទូលំទូលាយ ដែលចិនបានដាក់ក្នុងឆ្នាំ២០២០៕