គណបក្សកាន់អំណាចរបស់ប្រទេសបង់ក្លាដែស បានធ្វើការប្រមូលផ្តុំគ្នាធ្វើយុទ្ធនាការ ក្នុងទីក្រុងដាកា កាលពីថ្ងៃចន្ទ (ទី១ ខែមករា) នៅមុនពេលការបោះឆ្នោតសកល ដែលបានគ្រោងធ្វើនៅថ្ងៃទី៧ ខែមករា ដែលគណបក្សប្រឆាំងដ៏សំខាន់របស់ប្រទេសនេះ កំពុងធ្វើពហិការ។

ប្រទេសដែលមានប្រជាជនជិត ១៧០លាននាក់នេះ នឹងរៀបចំការបោះឆ្នោត នៅថ្ងៃអាទិត្យចុងសប្ដាហ៍នេះ នៅក្នុងការបោះឆ្នោតមួយ ដែលមនុស្សជាច្រើនរំពឹងថា នឹងផ្តល់ឲ្យគណបក្សកាន់អំណាច Awami League នូវអាណត្តិទី៤ ជាប់ៗគ្នា និងជ័យជម្នះយ៉ាងលើសលប់ សម្រាប់នាយករដ្ឋមន្ត្រី លោកស្រី Sheikh Hasina ដែលកាន់អំណាចតាំងពីឆ្នាំ២០០៩ មក។

ស្របពេលព្រឹត្តិការសម្រេចជោគវាសនារបស់ប្រទេសជិតកើតឡើងហើយនោះ បណ្ដាគណបក្សប្រឆាំងសំខាន់ៗរបស់ប្រទេស កំពុងធ្វើពហិការមិនចូលរួមការបោះឆ្នោត នាពេលខាងមុខនេះឡើយ ខណៈដែលលោកស្រី Hasina បានច្រានចោលការទាមទារឲ្យចុះចេញពីតំណែង ដែលនឹងអនុញ្ញាតឲ្យការបោះឆ្នោតមួយ ដែលប្រព្រឹត្តទៅក្រោមរដ្ឋាភិបាលបណ្តោះអាសន្នអព្យាក្រឹត។ ដូច្នេះ មានន័យថា បេក្ខជននៅលើសន្លឹកឆ្នោតទាំងអស់ នាថ្ងៃអាទិត្យនេះ នឹងមានមកតែពីគណបក្ស Awami League សម្ព័ន្ធមិត្តរបស់គណបក្សនេះ ឬបេក្ខជនឯករាជ្យប៉ុណ្ណោះ។

ក្នុងអំឡុងពេលការប្រមូលផ្តុំធ្វើយុទ្ធនាការបោះឆ្នោត ក្នុងទីក្រុងដាកា លោកស្រី Hasina បាននិយាយថា៖ «មិនមានអ្វីចាំបាច់ឲ្យពួកយើងពាក់ព័ន្ធនឹងទង្វើលួចសន្លឹកឆ្នោតនោះទេ។ ជាមួយនឹងលទ្ធិប្រជាធិបតេយ្យដែលកំពុងបន្តមាននៅក្នុងប្រទេសនេះ សេវាសាធារណៈបានកើនឡើង ហើយយើងទទួលបានសំឡេងឆ្នោតដោយការភ្ជាប់ទំនាក់ទំនងដ៏បរិសុទ្ធជាមួយប្រជាជន»។

សូមបញ្ជាក់ថា ក្នុងរយៈពេលប៉ុន្មានខែចុងក្រោយនេះ មនុស្សរាប់ម៉ឺននាក់ បានចេញតវ៉ាជាច្រើនដង ដែលទាមទារលោកស្រី Hasina លាលែងពីតំណែង នៅមុនការបោះឆ្នោតនេះ។ បណ្ដាមេដឹកនាំជាច្រើននៃគណបក្សប្រឆាំងសំខាន់ៗរបស់ប្រទេស និងអ្នកគាំទ្ររបស់ខ្លួន កំពុងជាប់ពន្ធនាគារ។ គណបក្សប្រឆាំងដ៏ធំបំផុតនៃគណបក្សជាតិនិយមបង់ក្លាដែស បាននិយាយថា ពួកគេមិនមានជំនឿនោះទេថា គណបក្ស Awami League នឹងរៀបចំការបោះឆ្នោតមួយ ដោយសេរី និងយុត្តិធម៌៕