ភ្នំពេញ ៖ ក្រសួងការបរទេស និងសហប្រតិបត្តិការអន្តរជាតិកម្ពុជា បានប្រកាសថា រហូតមកដល់ពេលនេះ ពុំមានប្រ ជាពលរដ្ឋខ្មែរណាម្នាក់បាត់បង់ជីវិតឬរងគ្រោះដោយសារគ្រោះរញ្ជួយដីនៅប្រទេសជប៉ុននោះឡើយ ខណៈ និស្សិតខ្មែរចំនួន៨នាក់ដែលកំពុងរស់នៅតំបន់រញ្ជួញដីខ្លាំង ក៏ត្រូវបានជម្លៀសដល់ទីតាំងសុវត្ថិភាពផង ដែរ។

យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ដែល បានចេញនៅថ្ងៃទី២ ខែមករា ឆ្នាំ២០២៤នេះ បានលើកឡើងថា សុវត្ថិភាពរបស់ពលរដ្ឋខ្មែរគឺជាអាទិភាព ចម្បងបំផុតរបស់រាជរដ្ឋាភិបាល ហើយក្រសួង និងស្ថានទូតកម្ពុជា ប្រចាំនៅប្រទេសជប៉ុន បាននិងកំពុង តាមដានដោយយកចិត្តទុកដាក់នូវការវិវត្តនៃគ្រោះធម្មជាតិនេះ ក៏ដូចជាបានខិតខំទាក់ទងពលរដ្ឋខ្មែរមួយ ចំនួនរស់នៅក្នុងប្រទេសជប៉ុនផងដែរ។

សេចក្តីប្រកាសព័ត៌មានរបស់ក្រសួងការបរទេស បានឲ្យដឹងទៀតថា មានពលរដ្ឋខ្មែរចំនួនជាង១៦០០នាក់ ដែលរស់នៅក្នុងតំបន់រងគ្រោះ(ខេត្តចំនួន៦) ហើយយោងតាមព័ត៌មានបឋមរបស់ស្ថានទូត ខ្មែរប្រចាំនៅទីនោះបានបញ្ជាក់ថា គិតត្រឹមម៉ោង១០ ថ្ងៃទី២ ខែមករា ឆ្នាំ២០២៤នេះ ពុំមានរបាយការណ៍ អំពីករណីពលរដ្ឋខ្មែរដែលបានបាត់បង់ជីវិត ឬរងគ្រោះថ្នាក់ ដោយសារគ្រោះរញ្ជួញដីខាងលើនេះនោះទេ។

ដោយឡែកមានរបាយការណ៍អំពីនិស្សិតខ្មែរចំនួនបីរូប ដែលស្ថិតនៅក្នុងខេត្ត អីស៊ីកាវ៉ា និងចំនួន ៥នាក់ទៀត ស្ថិតនៅខេត្តនីកាតា ត្រូវបានជម្លៀសមកទីតាំងមានសុវត្ថិភាពរួចហើយដែរ។ ទាក់ទងនិងករណីខាងលើនេះ ស្ថានទូតកម្ពុជាប្រចាំនៅជប៉ុន នឹងបន្តតាមដាន និងសហការជាមួយអាជ្ញាធរជប៉ុនពាក់ ព័ន្ធ ដើម្បីរាយការណ៍ជាប្រចាំអំពីស្ថានភាពវិវត្តន៍។

ជាមួយគ្នានោះដែរក្រសួងការបរទេស បានអំពាវនាវដល់ពលរដ្ឋខ្មែរដែលកំពុងរស់នៅក្នុងប្រទេស ជប៉ុន បន្តមានការប្រុងប្រយ័ត្នខ្ពស់ ព្រមទាំងគោរព និងអនុវត្តតាមការណែនាំរបស់អាជ្ញាធរជប៉ុន ដើម្បី សុវត្តិភាពផ្ទាល់ខ្លួនផងដែរ៕ អត្ថបទ ៖ បាន ចក់