មនុស្សយ៉ាងហោចណាស់ ៤៨នាក់បានស្លាប់ បន្ទាប់ពីគ្រោះរញ្ជួយដីដ៏ខ្លាំងក្លាវាយប្រហារប្រទេសជប៉ុនចំថ្ងៃចូលឆ្នាំសកល ខណៈដែលក្រុមអ្នកសង្គ្រោះនៅថ្ងៃអង្គារនេះ កំពុងព្យាយាមទៅឲ្យដល់តំបន់ដាច់ស្រយាលនានាជាទីដែលអគារជាច្រើនត្រូវបានដួលរលំ ផ្លូវថ្នល់រងការបំផ្លិចបំផ្លាញនិងដាច់ចរន្តអគ្គិសនីលើលំឋានរាប់ម៉ឺនខ្នង។

យោងតាមសារព័ត៌មាន AFP មន្ត្រីប្រខេត្តអ៊ីហ្ស៊ីកាវ៉ា(Ishikawa)មួយរូប សុំមិនបញ្ចេញឈ្មោះ បាននិយាយថា អ្នកស្លាប់បានកើនឡើងដល់៤៨នាក់ ។  

ការរញ្ជួយដីកម្រិត៧,៦រ៉ិចទ័របានវាយប្រហារកាលពីរសៀលថ្ងៃចន្ទ ដោយបានបំផ្លាញអគារនានា កាត់ផ្ដាច់ចរន្តអគ្គិសនីពីលំនៅឋានរាប់ម៉ឺនខ្នង និងបានជំរុញឱ្យអ្នកស្រុកនៅតំបន់ឆ្នេរមួយចំនួនភៀសខ្លួនទៅកាន់ទីកន្លែងមានសុវត្ថិភាព។    

រញ្ជួយដីនេះក៏បានបង្កឲ្យមានរលកកម្ពស់ប្រហែល ១ម៉ែត្រ តាមបណ្តោយឆ្នេរសមុទ្រភាគខាងលិចដ៏វែងរបស់ប្រទេសជប៉ុន ក៏ដូចជានៅប្រទេសជិតខាងកូរ៉េខាងត្បូងផងដែរ។  

លោកនាយករដ្ឋមន្ត្រីជប៉ុន Fumio Kishida បាននិយាយអំឡុងជំនួបបន្ទាន់ថ្ងៃអង្គារនេះថាការស្វែងរក និងសង្គ្រោះ សម្រាប់អ្នកដែលរងផលប៉ះពាល់ពីការរញ្ជួយដី គឺជាសមរភូមិប្រជែងនឹងពេលវេលា។ 

បុគ្គលិកកងទ័ពត្រូវបានបញ្ជូនទៅជួយក្នុងប្រតិបត្តិការសង្គ្រោះ ខណៈអាកាសយានដ្ឋានក្នុងស្រុកមួយត្រូវបានបិទ បន្ទាប់ពីគ្រោះរញ្ជួយដី បានបណ្ដាលឲ្យប្រេះនៅលើផ្លូវរត់។

ទំហំនៃការខូចខាត នៅតែមិនច្បាស់លាស់មួយថ្ងៃបន្ទាប់ពីគ្រោះមហន្តរាយនេះ ដោយផ្លូវសំខាន់ៗទៅកាន់តំបន់ដែលរងផលប៉ះពាល់ខ្លាំងបំផុត បានរងការខូចខាតយ៉ាងធ្ងន់ធ្ងរ ដែលរារាំងដល់កិច្ចខិតខំប្រឹងប្រែងជួយសង្គ្រោះ៕