តម្លៃប្រេងបានហក់ឡើង ១,៥ភាគរយ នៅក្នុងដំណាក់កាលដំបូងនៃឆ្នាំថ្មី ដោយសារតែការរំខានដល់ការផ្គត់ផ្គង់ នៅមជ្ឈិមបូព៌ា បន្ទាប់ពីការប៉ះទង្គិចគ្នា រវាងកងទ័ពជើងទឹក នៅសមុទ្រក្រហម និងក្តីរំពឹងនៃតម្រូវការខ្ពស់ នៅថ្ងៃឈប់សម្រាក និងការជំរុញសេដ្ឋកិច្ច នៅចិន ដែលជាប្រទេសនាំចូលប្រេងឆៅដ៏ធំជាងគេបំផុតលើពិភពលោក។

តម្លៃប្រេងឆៅ Brent បានឡើង ១,២០ ដុល្លារ ឬ ១,៥ភាគរយ គឺឡើង ៧៨,២៤ ដុល្លារ ក្នុងមួយបារ៉ែល នៅត្រឹមម៉ោង ៤:៣៨នាទី ខណៈប្រេងឆៅ West Texas Intermediate របស់អាមេរិក មានតម្លៃ ៧២,៦៦ដុល្លារ ក្នុងមួយបារ៉ែល ដោយឡើង ១ដុល្លារ ឬ ១,៤ភាគរយ។

ការស្ទង់មតិរបស់សារព័ត៌មាន Reuters ចំពោះសេដ្ឋវិទូ និងអ្នកវិភាគជាច្រើន បានព្យាករថា ប្រេងឆៅ Brent នឹងមានតម្លៃជាមធ្យម ៨២,៥៦ដុល្លារ ក្នុងមួយបារ៉ែល នៅឆ្នាំនេះ ពោលគឺខ្ពស់ជាងតម្លៃមធ្យម ៨២,១៧ដុល្លារ ក្នុងឆ្នាំ២០២៣ បន្តិច។ អ្នកវិភាគ បានព្យាករថា កំណើនសេដ្ឋកិច្ចពិភពលោកដ៏ខ្សោយ នឹងកាត់បន្ថយតម្រូវការ ប៉ុន្តែរំពឹងថា ភាពតានតឹងភូមិសាស្ត្រនយោបាយ នឹងជួយគាំទ្រ។

កាលពីថ្ងៃអាទិត្យ (ទី៣១ ខែធ្នូ ឆ្នាំ២០២៣) ឧទ្ធម្ភាគចក្រអាមេរិក បានវាយទប់ស្កាត់ ចំពោះការវាយប្រហាររបស់ក្រុមសកម្មប្រយុទ្ធហ៊ួទី ដែលគាំទ្រដោយអ៊ីរ៉ង់នៅលើនាវាដឹកកុងតឺន័រ Maersk ក្នុងសមុទ្រក្រហម ដោយធ្វើឲ្យទូករបស់ក្រុមហ៊ួទីចំនួន ៣គ្រឿងលិច និងបានសម្លាប់ជនសកម្មប្រយុទ្ធចំនួន ១០នាក់ ដែលបង្កើនហានិភ័យនៃសង្គ្រាមអ៊ីស្រាអែល និងតំបន់ហ្កាហ្សា ក្លាយជាជម្លោះ ក្នុងតំបន់កាន់តែធំ។

ជម្លោះកាន់តែធំ អាចបិទផ្លូវទឹកដ៏សំខាន់ សម្រាប់ការដឹកជញ្ជូនការផ្គត់ផ្គង់ប្រេង ដូចជាសមុទ្រក្រហម និងច្រកសមុទ្រ Hormuz ក្នុងឈូងសមុទ្រ។ ប្រព័ន្ធផ្សព្វផ្សាយអ៊ីរ៉ង់ បានរាយការណ៍ កាលពីថ្ងៃចន្ទ (ទី១ ខែមករា) ថា បន្ទាប់ពីសមរភូមិទ័ពជើងទឹក នាវាចម្បាំងអ៊ីរ៉ង់មួយគ្រឿង បានបើកចូលទៅក្នុងសមុទ្រក្រហម។បើតាមទិន្នន័យតាមដាននាវា បានឲ្យដឹងថា យ៉ាងហោចណាស់មាននាវាដឹកប្រេងចំនួន ៤គ្រឿង ដែលដឹកជញ្ជូនប្រេងម៉ាស៊ូត និងប្រេងយន្តហោះពីមជ្ឈិមបូព៌ា និងឥណ្ឌា ទៅកាន់អឺរ៉ុប កំពុងធ្វើដំណើរជុំវិញទ្វីបអាហ្រ្វិក ដើម្បីគេចពីផ្លូវសមុទ្រក្រហម៕