ការិយាល័យនាយករដ្ឋមន្ត្រីអេត្យូពី លោក Abiy Ahmed បាននិយាយថា ប្រទេសអត់មានព្រំដែនជាប់សមុទ្រមួយនេះ កាលពីថ្ងៃចន្ទ (ទី១ ខែមករា) បានចុះហត្ថលេខាលើកិច្ចព្រមព្រៀងដំបូងមួយជាមួយតំបន់ផ្ដាច់ចេញពីប្រទេសសូម៉ាលី គឺសូម៉ាលីឡែន ដើម្បីប្រើប្រាស់កំពង់ផែសមុទ្រក្រហម Berbera របស់ដែនដីនេះ ខណៈដែលប្រទេសស្ថិតនៅតំបន់ស្នែងអាហ្វ្រិក (Horn of Africa) ឬឧបទ្វីបសូម៉ាលី បច្ចុប្បន្នពឹងផ្អែកលើប្រទេសជិតខាងជីប៊ូទី សម្រាប់ពាណិជ្ជកម្មតាមសមុទ្រភាគច្រើនរបស់ខ្លួន។

នៅក្នុងពិធីចុះហត្ថលេខាជាមួយប្រធានាធិបតីសូម៉ាលីឡែន លោក Muse Bihi Abdi នៅរដ្ឋធានីអាឌីសអាបេបារបស់ប្រទេសអេត្យូពី លោក Abiy បាននិយាយថា៖ «នេះគឺជាកិច្ចព្រមព្រៀងនាពេលនេះជាមួយបងប្អូនសូម៉ាលីឡែនរបស់យើង ហើយ MoU (អនុស្សរណៈនៃការយោគយល់គ្នា) ត្រូវបានចុះហត្ថលេខា នៅថ្ងៃនេះ»។

ជាមួយគ្នានេះ លោកប្រធានាធិបតី Abdi បានបន្ថែមថា ជាផ្នែកមួយនៃកិច្ចព្រមព្រៀងនេះ អេត្យូពីក៏នឹងក្លាយជាប្រទេសដំបូងគេ ដែលទទួលស្គាល់សូម៉ាលីឡែនជាប្រទេសឯករាជ្យមួយ ក្នុងពេលវេលាដ៏សមស្រប។

ទីប្រឹក្សាសន្តិសុខជាតិរបស់លោក Abiy គឺលោក Redwan Hussien បាននិយាយថា អនុស្សរណៈនេះបើកផ្លូវដល់ការអនុញ្ញាតឲ្យអេត្យូពីមានប្រតិបត្តិការសមុទ្រពាណិជ្ជកម្ម នៅក្នុងតំបន់ ដោយផ្តល់ឲ្យខ្លួននូវសិទ្ធិចូលទៅកាន់មូលដ្ឋានយោធា ដែលបានជួលនៅសមុទ្រក្រហម។

សូមបញ្ជាក់ថា សូម៉ាលីឡែនមិនទទួលបានការទទួលស្គាល់ជាអន្តរជាតិដោយទូលំទូលាយនោះទេ បើទោះជាបានប្រកាសស្វ័យភាពពីប្រទេសសូម៉ាលី ក្នុងឆ្នាំ១៩៩១ ក៏ដោយ ហើយប្រទេសសូម៉ាលី និយាយថា សូម៉ាលីឡែន គឺជាផ្នែកមួយនៃទឹកដីរបស់ខ្លួន៕