បាល់ទាត់៖ កីឡាករ អ៊ា​ន ពិសី បាន​សម្ដែង​ការ​សប្បាយ​ចិត្ត ក្រោយ​រក​បាន​គ្រាប់​បាល់​ដំបូង​ឲ្យ​ក្លិប​ព្រះខ័ន​រាជ​ស្វាយរៀង ក្នុង​ជំនួប​ជាមួយ​សមាគម​កីឡាបាល់ទាត់​កង​យោធពល​ខេមរភូមិន្ទ នៃ​ពានរង្វាន់ League Cup 2021 កាលពី​ចុង​សប្ដាហ៍​កន្លងទៅ ហើយ​បាន​ចាត់​ទុក​ការ​បញ្ចប់​ទីនេះ​គឺជា​កម្លាំងចិត្ត​ដ៏​សំខាន់ ដើម្បី​ជំរុញ​រូប​គេឲ្យ​កាន់តែ​ខិតខំ​ប្រឹង​បន្ថែម​ទៀត។​

​ខ្សែបម្រើ​វ័យក្មេងដែល​ផ្លាស់​មកពី​ សាលា​បាល់ទាត់​ជាតិ​បាទី​រូប​នេះ​បាន​បញ្ជាក់​ថា ខ្លួន​ពិតជា​រីក​រាយ​ចំពោះ​ការ​រក​បាន​គ្រាប់​បាល់​ដំបូង​ឲ្យ​ព្រះខ័ន​រាជ​ស្វាយរៀង និង​ជា​គ្រាប់​បាល់​ទី​២ ដែល​ខ្លួន​បាន​ស៊ុត​បញ្ចូល​ទី​ក្រុម​កង​យោធពល​ខេមរភូមិន្ទ ហើយ​វា​ជា​កម្លាំងចិត្ត​មួយ​ដ៏​សំខាន់ ដែល​ជួយ​ជំរុញ​ខ្លួន​ឲ្យ​ខិតខំ​ព្យាយាម​បន្ដ​ទៅ​មុខ​ទៀត ក៏ដូចជា​ព្យាយាម​រក​គ្រាប់​បាល់​បន្ថែម​ទៀត​សម្រាប់​ក្រុម។ លើស​ពី​នេះ ពិសី ក៏​សប្បាយចិត្ត​ដែល​គ្រូ​បង្វឹក​មាន​ទំនុក​ចិត្ត និង​ផ្ដល់​ឱកាស​ឲ្យ​ខ្លួន​បាន​បង្ហាញ​សមត្ថភាព​ផង​ដែរ។​ ​គួរ​បញ្ជាក់​ថា អ៊ា​ន ពិសី បាន​ជួយ​ក្រុមព្រះ​ខ័ន​រាជ​ស្វាយរៀង បើក​ការ​នាំមុខ​ក្រុម​ភ្ញៀវ​កង​យោធពល​ខេមរភូមិន្ទ ១​គ្រាប់​មុននៅ​នាទី​៥៧ ក្នុង​ជំនួប​បញ្ចប់​ពូ​ល B បន្ទាប់ពី​ប្ដូរ​ចូល​ជំនួស​ខ្សែប្រយុទ្ធ​សេ​ណាហ្គា​ល់ Robert Lopez Mendy បាន​ប្រមាណ ១៥​នាទី។

បន្ទាប់មក​ក៏​ត្រូវ​បាន​កីឡាករ Romario Alves រក​បាន​គ្រាប់​បាល់​តាម​ស្មើ​នៅ​ចុង​ម៉ោង ហើយ​ឈាន​ដល់​ការ​ទាល់​បាល់​ប៉េ​ណា​ល់​ទី​កាត់​សេចក្ដី​រក​ក្រុម​លេខ​១ ក្នុង​ពូ​ល ដោយ​ក្រុម​កង​យោ​ធពល​ខេមរភូមិន្ទ បាន​យកឈ្នះ​ក្រុម​ម្ចាស់ផ្ទះ​ព្រះខ័ន​រាជ​ស្វាយរៀង ៥-៣ តែម្ដង។​ ​តាមរយៈ​លទ្ធផល​នេះបាន​ធ្វើ​ឲ្យ​ក្រុម​កង​យោធពល​ខេមរភូមិន្ទ ​ឈរ​ចាំ​នៅ​វគ្គ​ផ្ដាច់ព្រ័ត្រនៃ​ពាន​រង្វាន់ League Cup 2021 ស្រប​ពេល​ក្រុម​ព្រះខ័ន​រាជ​ស្វាយរៀង​ ត្រូវ​ធ្វើ​ការប្រកួត​វគ្គ​ពាក់កណ្ដាល​ផ្ដាច់ព្រ័ត្រ​ជាមួយ​ក្រុម​វិសាខា​នា​ពេល​ខាង​មុខ៕

​អត្ថបទ៖ លី ឈុន​ឡា