អ៊ីរ៉ង់បាននិយាយកាលពីថ្ងៃចន្ទថា ខ្លួននឹងរក្សាសិទ្ធិក្នុងការឆ្លើយតបទៅនឹងការធ្វើឃាតមេបញ្ជាការអ៊ីរ៉ង់ជើងចាស់ នៅក្នុងប្រទេសស៊ីរី នៅកន្លែង និងពេលវេលាសមស្រប នាពេលថ្មីៗនេះ»។

អ្នកនាំពាក្យក្រសួងការបរទេសអ៊ីរ៉ង់ លោក Nasser Kanaani ក្នុងសន្និសីទសារព័ត៌មានប្រចាំសប្តាហ៍នៅរដ្ឋធានីតេអេរ៉ង់ បានថ្កោលទោសអ៊ីស្រាអែលចំពោះការវាយប្រហារទៅលើមេបញ្ជាការកងឆ្មាំបដិវត្តន៍អ៊ីស្លាមអ៊ីរ៉ង់ (IRGC) ដែលស្ថិតនៅក្នុងទីក្រុងដាម៉ាស(Damascus) ដើម្បីប្រយុទ្ធប្រឆាំងនឹងអំពើភេរវកម្មតាមសំណើរបស់រដ្ឋាភិបាលស៊ីរី។

ការអធិប្បាយរបស់លោក Kanaani បានកើតឡើង រយៈពេលមួយសប្តាហ៍ បន្ទាប់ពីលោក Seyyed Razi Mousavi ដែលបម្រើការជា «ទីប្រឹក្សាយោធា» នៅក្នុងប្រទេសស៊ីរី ត្រូវបានសម្លាប់ដោយការវាយប្រហារដោយមីស៊ីលនៅទីក្រុងដាម៉ាស កាលពីថ្ងៃទី២៥ ខែធ្នូ ឆ្នាំ២០២៣។

លោក Kanaani បាននិយាយថា ការវាយប្រហាររបស់អ៊ីស្រាអែល ប្រឆាំងនឹងទីប្រឹក្សាអ៊ីរ៉ង់ នៅក្នុងប្រទេសស៊ីរី គឺជា «ការរំលោភយ៉ាងច្បាស់លាស់ លើអធិបតេយ្យភាព និងបូរណភាពទឹកដី របស់រដ្ឋអារ៉ាប់ ក្នុងនាមជារដ្ឋឯករាជ្យ និងជាសមាជិកអង្គការសហប្រជាជាតិ និងការផ្សងព្រេងដែលមានបំណងបង្កជាឧបសគ្គដល សន្តិភាព និងសន្តិសុខ នៅក្នុងតំបន់»។

លោក Mousavi គឺជាសមមិត្តរបស់អតីតមេបញ្ជាការកងទ័ពអ៊ីរ៉ង់ លោក Qassem Soleimani ដែលត្រូវបានសម្លាប់ នៅក្នុងការវាយប្រហារដោយយានដ្រូនរបស់សហរដ្ឋអាមេរិក នៅជិតអាកាសយានដ្ឋានបាកដាដ ក្នុងខែមករា ឆ្នាំ ២០២០។