ភ្នំពេញ ៖ អំឡុងថ្ងៃឈប់សំរាកឆ្លងឆ្នាំសកល រយៈពេល៣ថ្ងៃ ចាប់ពីថ្ងៃទី៣០ ថ្ងៃទី៣១ ខែធ្នូឆ្នាំ២០២៣ ឈានចូលថ្ងៃទី១ ខែមករា ឆ្នាំ២០២៤ ទូទាំងប្រទេស មានភ្ញៀវទេសចរជាតិអន្តរជាតិ ចេញដើរកម្សាន្តសប្បាយរីករាយ មានប្រមាណជិត៣លាន៣សែននាក់ ក្នុងនោះទេសចរអន្តរជាតិមានប្រមាណជិត៦ម៉ឺននាក់។

តាមរបាយការណ៍ក្រសួងទេសចរណ៍ ចេញផ្សាយនៅល្ងាចថ្ងៃទី២ ខែ មករាឆ្នាំ២០២៤នេះ បានឲ្យដឹងថា នៅក្នុងចំណោមទេសចរជាតិ អន្តរជាតិ ប្រមាណជិត ៣លាន ៣សែននាក់ ដែលចេញដើរកម្សាន្តសប្បាយរីករាយ អំឡុងថ្ងៃឆ្លងឆ្នាំសកលរយៈពេលបីថ្ងៃនេះ រាជធានីខេត្តដែលបានទទួលភ្ញៀវទេសចរទៅកម្សាន្តសប្បាយច្រើនជាងគេ ៖ ទី១ រាជធានីភ្នំពេញ បានទទួលទេសចរជាតិអន្តរជាតិទស្សនាកម្សាន្តសប្បាយប្រមាណជិត៦០ម៉ឺននាក់ ទី២ ខេត្តព្រះសីហនុ បានទទួលភ្ញៀវទេសចរបានប្រមាណជិត៥០ម៉ឺននាក់ ទី៣ កំពត ទទួលភ្ញៀវទស្សនាប្រមាណជាង៤០ម៉ឺននាក់ ទី៤ ខេត្តសៀមរាប មានភ្ញៀវទៅទស្សនាកម្សាន្តជិត៣៧ម៉ឺននាក់ និងទី៥ ខេត្តបាត់ដំបង បានទទួលភ្ញៀវទស្សនាកម្សាន្តសប្បាយប្រមាណ៣៤ម៉ឺននាក់។

ឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ថ្លែងបញ្ជាក់ថា ជារួមគ្នា នៅគ្រប់រាជធានីខេត្តទាំងអស់សុទ្ធតែបានរៀបចំតុបតែងលំអរ ខេត្ត រាជធានីរបស់ខ្លួន និងបានរៀបចំព្រឹត្តិការណ៍ រៀបចំកម្មវិធី ប្រគំតន្ត្រី តាំងពិព័តណ៌បង្ហាញផលិតផលផ្សេងៗ ដើម្បីទាក់ទាញភ្ញៀវទេសចរជាតិ អន្តរជាតិ អញ្ជើញទៅកម្សាន្តសប្បាយ អបអរសាទរឆ្លងឆ្នាំសកល ឆ្នាំ២០២៣ ឈានចូលឆ្នាំ២០២៤ ។

ឯកឧត្តម តុប សុភ័ក បន្តថា ព្រមជាមួយគ្នានេះ បណ្តាអាជ្ញាធរមូលដ្ឋាន កងកម្លាំងមានសមត្ថកិច្ចនៅតាមបណ្តាខេត្តរាជធានី គឺបានខិតខំបំពេញការងារ ថែរក្សាសន្តិសុខ សណ្តាប់ធ្នាប់ សុខសុវត្ថិភាពជូនភ្ញៀវទេសចរជាតិអន្តរជាតិ ទៅលេងកម្សាន្ត និងបានជំរុញឲ្យកម្មវិធីឆ្លងឆ្នាំសកល មានភាពសប្បាយរីករាយ នៅគ្រប់គោលដៅទេសចរណ៍នៅតាមខេត្តរាជធានីទាំងអស់ ជាពិសេសខេត្តរាជធានី ដែលជាគោលដៅទេសចរណ៍ធំៗ។ អត្តបទ ៖ ស៊ុម សុខជា