មន្ត្រីមូលដ្ឋាន នៅថ្ងៃអង្គារ (ទី២ ខែមករា) បានប្រាប់ថា អ្នកស្រុកជាង ២.០០០នាក់ ត្រូវបានជម្លៀសទៅកាន់ទីជម្រកបណ្តោះអាសន្ន ដោយការកើនឡើងនូវសកម្មភាពបន្ទុះ ក្នុងភ្នំភ្លើងមួយ នៅភាគខាងកើតប្រទេសឥណ្ឌូនេស៊ី។

ភ្នំភ្លើង Lewotobi Laki-Laki ក្នុងខេត្ត East Nusa Tenggara បានផ្ទុះជាច្រើនដងមកនហើយ ក្នុងប៉ុន្មានសប្តាហ៍ថ្មីៗនេះ ក្នុងរួមទាំងការផ្ទុះមួយ កាលពីថ្ងៃចន្ទ ដែលបានព្រួសផេះភ្នំភ្លើងចម្ងាយដល់ទៅ ១,៥ គីឡូម៉ែត្រពីលើកំពូលរបស់ភ្នំភ្លើងនេះ។ នេះបើយោងតាមមជ្ឈមណ្ឌល សម្រាប់ការសិក្សាពីបន្ទុះភ្នំភ្លើង និងការសម្រាលគ្រោះមហន្តរាយភូគព្ពសាស្ត្រ (PVMBG)។ ទីភ្នាក់ងារនេះបានកត់ត្រាបន្ទុះមួយទៀតពីភ្នំភ្លើង Lewotobi Laki-Laki នៅថ្ងៃអង្គារនេះ ប៉ុន្តែសំណុំផេះភ្នំភ្លើងនេះ មិនត្រូវបានឃើញនោះទេ។

លោក Benediktus Bolibapa Herin មន្ត្រីប្រចាំតំបន់ East Flores បានប្រាប់សារព័ត៌មាន AFP នៅថ្ងៃអង្គារនេះថា ផេះភ្នំភ្លើងពីការផ្ទុះថ្មីៗនេះ បានប៉ះពាល់ដល់អនុតំបន់ចំនួន២ ដែលនៅក្បែរភ្នំ Lewotobi Laki-Laki ដោយបានជំរុញឲ្យអ្នកស្រុកជាង ២.២០០នាក់ ជម្លៀសទៅកាន់ទីជម្រកបណ្តោះអាសន្ន ដែលបង្កើតឡើងដោយរដ្ឋបាលក្នុងតំបន់។

អាជ្ញាធរ កាលពីថ្ងៃចន្ទ (ទី១ ខែមករា) បានដំឡើងលំដាប់របស់ភ្នំភ្លើងនេះដល់កម្រិតខ្ពស់បំផុតទី២ នៃកម្រិតប្រកាសអាសន្ន ៤កម្រិតរបស់ប្រទេសឥណ្ឌូនេស៊ី ហើយបានពង្រីកតំបន់ ដែលត្រូវដកចេញពី ២គីឡូម៉ែត្រទៅ ៤គីឡូម៉ែត្រ ជុំវិញមាត់រណ្ដៅភ្នំភ្លើង។

ប្រទេសប្រជុំកោះអាស៊ីអាគ្នេយ៍មួយនេះ មានទីតាំងស្ថិតនៅលើ «Ring of Fire» (មណ្ឌលភ្នំភ្លើង) របស់មហាសមុទ្រប៉ាស៊ីហ្វិក ជាតំបន់ដែលមានភ្នំភ្លើងសកម្ម និងរញ្ជួយដីខ្លាំងក្លា។ កាលពីខែមុន ភ្នំភ្លើង Marapi នៅលើកោះស៊ូម៉ាត្រា បានផ្ទុះ ហើយមនុស្ស ២៣នាក់ បានស្លាប់។ ប្រទេសឥណ្ឌូនេស៊ី មានភ្នំភ្លើងសកម្មជិត ១៣០ភ្នំភ្លើង៕