អង្គភាព ស៊ីម៉ាក់ បានបង្ហាញលទ្ធផលប្រតិបត្តិការឲ្យដឹងថា គិតចាប់ពីឆ្នាំ១៩៩២ រហូតដល់ខែធ្នូ ចុងឆ្នាំ២០២៣មកនេះ បានធ្វើការបោសសម្អាតផ្ទៃដីចម្ការមីន និងចម្ការគ្រាប់សរុបចំនួនជាង ១ ៧៣៥ គីឡូ ម៉ែត្រក្រឡា រុករកឃើញ និងកម្ទេចចោលគ្រាប់មីន និងគ្រាប់យុទ្ធភណ្ឌមិនទាន់ផ្ទុះគ្រប់ប្រភេទប្រមាណជាង ៣ លានគ្រាប់ ក្នុងនោះមីនប្រឆាំងមនុស្សជាង ៥៨ ម៉ឺនគ្រាប់ គ្រាប់មីនប្រឆាំងរថក្រោះចំនួន ១,១ ម៉ឺនគ្រាប់ យុទ្ធភណ្ឌមិនទាន់ផ្ទុះចំនួន ២,៤ លានគ្រាប់ គ្រាប់បែកទម្លាក់ពីយន្តហោះរួម និងគ្រាប់បែកចង្កោមចំនួន ១,២ សែនគ្រាប់ផងដែរ។
ស៊ីម៉ាក់ឲ្យដឹងថា ភាពជោគជ័យនេះក៏ដោយសារអង្គភាព ស៊ីម៉ាក់ បានសាងកម្លាំងស្ម័គ្រចិត្តជាបណ្តាញតាមភូមិដែលមានអាទិភាពខ្ពស់ចំនួនជាង៣,៥០០ភូមិ និងមានបណ្តាញស្ម័គ្រចិត្តជិត ៤,០០០នាក់នៅទូទាំងប្រទេស សម្រាប់បម្រើការងារអប់រំផ្សព្វផ្សាយការយល់ដឹងពីគ្រោះ ថ្នាក់ ដោយសារមីន និងសំណល់យុទ្ធភណ្ឌសង្គ្រាមនិងបានយកចិត្តទុកដាក់កសាងសមត្ថភាព និងការពង្រឹងទំនាក់ ទំនងរវាងអជ្ញាធរមូលដ្ឋានទាំងកម្រិតភូមិឃុំស្រុកនិងខេត្តជាយន្តការថ្នាក់ ក្រោមជាតិយ៉ាងមានប្រសិទ្ធភាពក្នុងការផ្សព្វផ្សាយឲ្យយល់ដឹងពីគ្រោះថ្នាក់ដោយសារគ្រាប់មីន និងឆ្លើយតបរាល់សំណូមពររបស់ប្រជាពលរដ្ឋ ។ ជាក់ស្តែង កាលពីក្នុងឆ្នាំ ២០២៣មកនេះអង្គភាព CMAC ធ្វើការអប់រំឲ្យយល់ដឹងពីគ្រោះថ្នាក់ដោយសារគ្រាប់មីន និងសំណល់ជាតិផ្ទះពីសង្គ្រាមដល់ក្រុមគោលដៅចំនួន ១៥,០០០ លើកស្មើនឹង ៥៥០,០០០ខ្នងផ្ទះ ដោយគិតសរុប នៃប្រជាពលរដ្ឋចូលរួមចំនួន ១,២០០,០០០នាក់។
ដោយសារតែអង្គភាពCMACមាននីតិវិធី និងបទដ្ឋានការងារច្បាស់លាស់ ជាហេតុមានការទទួលស្គាល់កម្រិតជាតិ និងអន្តរជាតិជាមួយការប្រើប្រាស់សម្ភារបច្ចេកទេសទំនើបតែអ្វីដែលសំខាន់ចាំបាច់បំផុតនោះ គឺធនធានមនុស្សប្រកបដោយចំណេះដឹង និងទេពកោសល្យ ដូចនេះចំពោះការងារហ្វឹកហ្វឺនគឺបានបំពេញតួរនាទីយ៉ាងសំខាន់ព្រោះថាបុគ្គលិកអ្នកដោះមីនទាមទាអោយមានពហុជំនាញកាន់តែប្រសើរឡើងរួមមានជំនាញផែនទី ជំនាញស្រាវជ្រាវ ជំនាញកម្ទេច និងដោះបន្សាបគ្រាប់មីនជាដើម។ ព្រមទាំងបានហ្វឹកហ្វឺនជូនកម្លាំងនគរបាលជាតិ និងកងយោធពលខេមរៈភូមិន្ទមួយចំនួនផងដែរ។ លើសពីនេះទៀត ដោយមើល ឃើញនូវបទពិសោធន៍ និងជោគជ័យរបស់អង្គភាព CMAC បានធ្វើឲ្យប្រទេសដែលមានបញ្ហាគ្រាប់មីន និងគ្រាប់យុទ្ធភណ្ឌមិនទាន់ផ្ទុះមួយចំនួនដូចជា ប្រទេសឡាវ វៀតណាម ថៃ ស្រីលង្កា អ៊ីរ៉ាក់ ឃីដអង់ហ្គោឡា អ៊ុយក្រែន បណ្តាប្រទេសអាហ្វ្រីកនិង ប្រទេសកូឡុំប៊ីជាដើម បានស្នើសុំឲ្យCMAC ចែករំលែកបទពិសោធន៍របស់ខ្លួន។ ជាក់ស្តែងរាជរដ្ឋាភិបាលជប៉ុន តាមរយៈទីភ្នាក់ងារសហ ប្រតិបត្តិការអន្តរជាតិជប៉ុន (JICA) បានផ្តល់ការគាំទ្រអង្គភាពCMACឲ្យជួយផ្តល់ការហ្វឹកហ្វឺនដល់មន្ត្រីជំនាញមីនរបស់ប្រទេសកូឡុំប៊ី អង់ហ្គោឡា អ៊ីរ៉ាក់ ឡាវ អ៊ុយក្រែន ប្រទេសអាហ្វ្រីកជាដើម។
សូមជម្រាបថា កាលពីថ្ងៃទី២ ខែមករា ឆ្នាំ២០២៤ នៅទីបញ្ជាការស៊ីម៉ាក់ភ្នំពេញ ឯកឧត្តម ហេង រតនា ប្រតិភូរាជ រដ្ឋាភិបាល ទទួលបន្ទុកជាអគ្គនាយក(CMAC) បានប្រជុំមន្ត្រីបុគ្គលិកផ្ទៃក្នុងដើម្បីលើកទិសដៅការអនុវត្តការងារសម្រាប់ឆ្នាំ២០២៤នេះ ដោយដាក់ចេញគម្រោងនៃកង ឯកភាពកម្ចាត់មីនទាំង៦ ដែលនឹងត្រូវអនុវត្តបន្តពីឆ្នាំចាស់ដោយការចេញនូវផែនការបោសសម្អាតគ្រាប់មីន និងសំណល់យុទ្ធភណ្ឌសង្រ្គាមសរុបទូទាំងប្រទេសប្រមាណ ២៨៤ គីឡូម៉ែត្រក្រឡា និងអប់រំការយល់ដឹងពីគ្រោះថ្នាក់មីនដល់ប្រជាជនគោលដៅប្រមាណ ២ លាននាក់រួម និងផែនការស្រាវជ្រាវថ្មីឡើងវិញផងដែរ ដើម្បីឆ្លើយតបទៅនឹងផែនការក្រោយឆ្នាំ២០២៥ បន្តទៀតនោះ៕ អត្ថបទ៖ ភារម្យ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
