ក្រុមនិស្សិតខ្មែរ ដែលកំពុងសិក្សានៅប្រទេសជប៉ុន បានចេញវីដេអូបញ្ជាក់ពីសុវត្ថិភាពរបស់ពួកគេ បន្ទាប់ពីគ្រោះមហន្តរាយ ដោយការរញ្ជួយដីនៅប្រទេសជប៉ុនម្រិត ៧,៦ រ៉ិចទ័រ នាថ្ងៃទី១ ខែមករា ឆ្នាំ២០២៤ កន្លងទៅនេះ។

អ្នកនាំពាក្យក្រសួងការបរទេស និង​សហប្រតិបត្តិការ​អន្តរជាតិ​កម្ពុជា​បាន​បញ្ជាក់​អំពី​ស្ថាន​ភាព​ពលរដ្ឋ​ខ្មែរ​រស់នៅក្នុងប្រទេសជប៉ុន បន្ទាប់ពីមានគ្រោះរញ្ជួយដីកម្រិត ៧,៦ រ៉ិចទ័រ នាថ្ងៃទី១ ខែមករា ឆ្នាំ២០២៤នេះដែរថា សុវត្ថិភាពរបស់ពលរដ្ឋខ្មែរ គឺ​ជា​អាទិភាព​ចម្បង​បំផុត​របស់​រាជ​រដ្ឋាភិបាល ក្រសួងការបរទេស និងស្ថានទូតកម្ពុជា ប្រចាំប្រទេសជប៉ុន បាននិងកំពុង​តាមដាន​ដោយ​យកចិត្តទុកដាក់នូវការវិវត្តនៃគ្រោះធម្មជាតិនេះ ក៏ដូចជាបានខិតខំទាក់ទងពលរដ្ឋខ្មែរមួយ ចំនួនរស់នៅក្នុងប្រទេសជប៉ុន។ ស្ថានទូតក៏បានផ្សព្វផ្សាយនូវលេខទូរស័ព្ទ ០៨០ ៤៦៨៩ ៩៣៧៤ និងទំព័រហ្វេសបុករបស់ស្ថានទូត (Royal Embassy of Cambodia in Japan) សម្រាប់​ការទំនាក់ទំនងដោយផ្ទាល់ ក្នុងករណីមានតម្រូវការចាំបាច់ណាមួយ។

យោងតាមរបាយការណ៍ស្ថានទូតកម្ពុជា មានពលរដ្ឋខ្មែរចំនួនជាង ១ ៦០០ នាក់ ដែល រស់​នៅ​ក្នុង​តំបន់​រងគ្រោះ (ខេត្តចំនួន៦)។ យោងតាមព័ត៌មានបឋមរបស់ស្ថានទូតកម្ពុជា (គិតត្រឹម​ថ្ងៃ​ទី២​ ខែមករា ឆ្នាំ២០២៤ វេលាម៉ោង ១០ ព្រឹក ពុំមានរបាយការណ៍ អំពី​ករណី​ពលរដ្ឋខ្មែរ​ដែល​បាន​បាត់​បង់ជីវិត ឬរងគ្រោះថ្នាក់ ដោយសារគ្រោះរញ្ជួយដី ខាងលើទេ។ ដោយឡែក​មាន​របាយការណ៍​អំពី​និស្សិតខ្មែរចំនួន ៣ រូប ដែលស្ថិតក្នុងខេត្ត Ishikawa និងចំនួន ៥ រូបផ្សេង​ទៀត​ដែល​ស្ថិតក្នុងខេត្ត នីហ្កាតា (Niigata) ត្រូវបានជម្លៀស​មក​ ទីតាំង​មាន​សុវត្ថិភាព​រួច​ហើយ​។ ស្ថានទូតកម្ពុជានឹងបន្តតាមដាន និងសហការជាមួយ អាជ្ញាធរជប៉ុនពាក់ព័ន្ធ ដើម្បី​រាយការណ៍​ជា​ប្រចាំ​អំពី​ស្ថានភាពវិវត្តន៍។

ក្រសួងការបរទេស និងសហប្រតិបត្តិការអន្តរជាតិកម្ពុជា បាន​អំពាវនាវ​ពលរដ្ឋខ្មែរ​ដែល​កំពុង​រស់​នៅ​ក្នុង​ប្រទេសជប៉ុនបន្តមានការប្រុងប្រយ័ត្នខ្ពស់ ព្រមទាំងគោរព និងអនុវត្តតាម ការណែនាំ​របស់​អាជ្ញាធរ​ជប៉ុន ដើម្បីសុវត្ថិភាពផ្ទាល់ខ្លួន៕ អត្ថបទ៖ វ៉ន ដារ៉ា