ប្រព័ន្ធផ្សព្វផ្សាយរដ្ឋរបស់ចិន បានបង្ហាញរូបភាពថ្មីនៃនាវាផ្ទុកយន្តហោះទំនើបបំផុតរបស់ប្រទេសចិន រួមទាំងផ្លូវនៃការបាញ់បង្ហោះជំនាន់ក្រោយ ដែលអាចបាញ់បង្ហោះយន្តហោះជាច្រើនប្រភេទចេញពីនាវារបស់ខ្លួន។ នាវាផ្ទុកយន្តហោះហ្វ៊ូជាន (Fujian) ត្រូវបានបង្ហាញជាសាធារណៈជាលើកដំបូងនៅខែមិថុនា ឆ្នាំ២០២២ ហើយត្រូវបានរចនា និងសាងសង់ក្នុងស្រុកទាំងស្រុង។

ដោយមិនទាន់ធ្វើការសាកល្បងលើសមុទ្រជាលើកដំបូងរបស់ខ្លួន នាវាផ្ទុកយន្តហោះនេះមានទំហំធំជាង និងមានបច្ចេកវិទ្យាទំនើបជាង នាវាផ្ទុកយន្តហោះ សានតុង (Shandong) ដែលត្រូវបានដាក់ឱ្យដំណើរការនៅឆ្នាំ២០១៩ និងនាវាផ្ទុកយន្តហោះ ឡាវនីង (Liaoning) ដែលចិនបានទិញបន្តពីអ៊ុយក្រែន ក្នុងឆ្នាំ១៩៩៨ ហើយបានជួសជុលក្នុងស្រុក។

នាវា ហ្វ៊ូជាន បាននិងកំពុងធ្វើការសាកល្បង រួមទាំងការធ្វើតេស្តលើកន្លែងផ្ទុក មុនពេលការសាកល្បងក្នុងសមុទ្ររបស់វា ដែលអ្នកសង្កេតការណ៍មួយចំនួនរំពឹងថានឹងធ្វើឡើងនៅឆ្នាំ២០២៣។

ក្រៅពីនាវាផ្ទុកយន្តហោះ ហ្វដក្លាស (Ford-Class) ដែលជាប្រភេទនាវាផ្ទុកថាមពលនុយក្លេអ៊ែរថ្នាក់ថ្មីដែលកំពុងត្រូវបានបង្កើតឡើងសម្រាប់កងទ័ពជើងទឹកសហរដ្ឋអាមេរិក នាវាហ៊្វូជាន នេះនឹងក្លាយជានាវាផ្ទុកយន្តហោះតែមួយគត់នៅលើពិភពលោកដែលបំពាក់ដោយប្រព័ន្ធបាញ់បង្ហោះយន្តហោះអេឡិចត្រូនិចចុងក្រោយបង្អស់ (EMALS)៕