អាជ្ញាធរព្រំដែនអាមេរិក កាលពីថ្ងៃអង្គារ (ទី២ ខែមករា) បាននិយាយថា សហរដ្ឋអាមេរិកនឹងបើកច្រកព្រំដែនអាមេរិក-ម៉ិកស៊ិកស្របច្បាប់ចំនួន៤ ឡើងវិញ នៅថ្ងៃទី៤ ខែមករា ខណៈដែលតួលេខដ៏ខ្ពស់នៃជនអន្តោប្រវេសន៍ខុសច្បាប់ បានធ្លាក់ចុះ ហើយបុគ្គលិកមានភាពធូរស្រាលជាងមុន។

ទីភ្នាក់ងារគយ និងការពារព្រំដែនអាមេរិក (CBP) បានឲ្យដឹងនៅក្នុងសេចក្តីប្រកាសព័ត៌មានថា សហរដ្ឋអាមេរិកនឹងចាប់ផ្ដើមប្រតិបត្តិការឡើងវិញ នៅឯស្ពានអន្តរជាតិ នៅទីក្រុង Eagle Pass ក្នុងរដ្ឋ Texas ច្រកឆ្លងកាត់ចំនួន២ នៅរដ្ឋ Arizona និងមួយទៀត នៅជិតទីក្រុង San Diego រដ្ឋ California ដោយបន្ថែមថា ខ្លួននឹងបន្តផ្តល់អាទិភាពដល់សន្តិសុខព្រំដែន «តាមភាពចាំបាច់»។

កាលពីខែធ្នូ អាជ្ញាធរព្រំដែនអាមេរិកបានប្រឹងប្រែងដោះស្រាយនឹងលំហូរជនអន្តោរប្រវេសន៍ ខណៈដែលការចាប់ខ្លួនបានឡើងដល់ជិត ១១.០០០នាក់ ក្នុងមួយថ្ងៃ ដែលមន្ត្រីបច្ចុប្បន្ន និងអតីតមន្ត្រីមួយចំនួន បាននិយាយថា ជិត ឬមានកម្រិតខ្ពស់បំផុត។ បណ្ដាមន្ត្រីអាមេរិកបាននិយាយថា សមាជិកសភានៅតែពិភាក្សាលើកិច្ចព្រមព្រៀង ដែលអាចធ្វើទៅបាន ដែលនឹងរួមបញ្ចូលការបង្កើនវិធានការសន្តិសុខ តាមព្រំដែន ជាមួយនឹងជំនួយបរទេស រួមទាំងថវិកាយោធា សម្រាប់អ៊ុយក្រែនផងដែរ។

មន្ត្រីម៉ិកស៊ិក និងសហរដ្ឋអាមេរិកបានសន្យាកាលពីសប្តាហ៍មុនថា នឹងធ្វើការរួមគ្នាកាន់តែជិតស្និទ្ធបន្ថែមទៀត ដើម្បីដោះស្រាយបញ្ហាជនអន្តោប្រវេសន៍ នៅតាមព្រំដែនរួមគ្នារបស់ប្រទេសទាំង២ បន្ទាប់ពីមន្ត្រីជាន់ខ្ពស់សហរដ្ឋអាមេរិក បានធ្វើដំណើរទៅម៉ិកស៊ិក ដើម្បីជួបជាមួយប្រធានាធិបតីម៉ិកស៊ិក លោក Andres Manuel Lopez Obrador។

មន្ត្រីជាន់ខ្ពស់ម៉ិកស៊ិកបានបង្កើនការអនុវត្តច្បាប់អន្តោប្រវេសន៍ ក្នុងប៉ុន្មានសប្តាហ៍ថ្មីៗនេះ ក្នុងនោះរួមទាំងការផ្លាស់ជនអន្តោរប្រវេសន៍ទៅកាន់ភាគខាងត្បូងម៉ិកស៊ិក និងចាប់ផ្ដើមឡើងវិញនូវជើងហោះហើរនិរទេសទៅកាន់ប្រទេសវេណេហ្ស៊ុយអេឡា។ នេះបើតាមមន្ត្រីជាន់ខ្ពស់អាមេរិក ដែលបាននិយាយអំឡុងពេលឆ្លើយឆ្លងទូរស័ព្ទជាមួយអ្នកសារព័ត៌មាន កាលពីថ្ងៃទី២ ខែមករា ដោយសុំមិនបញ្ចេញឈ្មោះជាលក្ខខណ្ឌនៃការផ្ដល់ព័ត៌មាននេះ។ ប្រទេសម៉ិកស៊ិក កាលពីល្ងាចថ្ងៃទី២ ខែមករា ក៏បានអបអរដល់ការបើកច្រកព្រំដែនឡើងវិញនេះដែរ៕