ក្រុមមនុស្សធម៌របស់អង្គការសហប្រជាជាតិ បាននិយាយកាលពីថ្ងៃអង្គារថា ការកើនឡើងនៃអរិភាពនៅក្នុងប្រទេសស៊ីរីភាគពាយព្យ បានបង្កើនការព្រួយបារម្ភដល់ជនស៊ីវិលក្នុងតំបន់ និងបុគ្គលិកUNដែលកំពុងបំពេញបេសកកម្មជំនួយឆ្លងព្រំដែន។

អាជ្ញាធរសុខាភិបាលក្នុងតំបន់ បានរាយការណ៍ថា ការបាញ់ផ្លោងនៅក្នុងសង្កាត់ Idlib និងសង្កាត់ភាគខាងលិចទីក្រុងអាឡិបប៉ូ (Aleppo) បានសម្លាប់មនុស្សយ៉ាងហោចណាស់ ៧ នាក់ រួមទាំងក្មេងជំទង់ម្នាក់ និងបុរសអាយុ ១០០ឆ្នាំម្នាក់។ ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា មនុស្ស៩ក្នុងចំណោមមនុស្សជិត ៣០នាក់ ដែលត្រូវបានរាយការណ៍ថា បានរងរបួស គឺជាកុមារ រួមទាំងទារកអាយុ២ខែម្នាក់ផងដែរ។

ការិយាល័យនោះ ក៏បានរាយការណ៍ថា យ៉ាងហោចណាស់សាលារៀនចំនួនពីរ បានរងការខូចខាត នៅភាគពាយព្យនៃទីក្រុងអាឡិបប៉ូ។

OCHA បាននិយាយថា ខ្លួននៅតែបន្តជួបជាមួយប្រជាពលរដ្ឋដែលរងផលប៉ះពាល់ តាមដានកម្មវិធីជំនួយ និងធ្វើការវាយតម្លៃតម្រូវការ ទោះបីជាមានការកើនឡើងនៃអរិភាពក៏ដោយ។

OCHA បានបន្តទៀតថា៖«ចាប់តាំងពីថ្ងៃទី៥ ខែតុលា មនុស្សជាង១០០ នាក់ត្រូវបានសម្លាប់ជិត៤០ភាគរយនៃពួកគេ ជាកុមារ ដោយសារការបាញ់ផ្លោង និងអំពើហិង្សាផ្សេងទៀត នៅភាគពាយព្យនៃប្រទេសស៊ីរី និងជាង៤០០នាក់ផ្សេងទៀត បានរងរបួស»។