​បាល់ទាត់៖ ​​ការប្រកួត​បាល់ទាត់​ជើងឯក​ទ្វីប​អឺរ៉ុប Euro ២០២០ បាន​បញ្ចប់​វគ្គ​វិល​ជុំ​ ២​ពូ​ល​ទៀត​ហើយ​គឺ​ពូ​ល B និង​ពូ​ល C​។ ​ក្រុម​ដា​ណឺ​ម៉ាក​ដែល​ចាញ់ ២ប្រកួត​ដំបូង​ក្នុង​ពូ​ល​រួមមាន​ចាញ់​ហ្វាំ​ង​ឡង់ ១-០ និង​ចាញ់​ប៊ែ​ល​ហ្ស៊ិ​ក ១-២ នោះ​បាន​យកឈ្នះ​ប្រកួត​ចុងក្រោយ​ក្នុង​ពូ​ល B នេះ​ដោយ​បំបាក់​រុស្ស៊ី ៤-១ ធានា​បាន​កៅអី​លេខ២ ក្នុង​ពូ​ល​មានមុខ​នៅ​វគ្គ ១៦​ក្រុម​ចុងក្រោយ​ដោយ​ស្វ័យប្រវត្តិ​។

​​ចំណែក​បែលហ្ស៊ិក​គឺជា​ក្រុម​លេខ ១ ក្នុង​ពូ​ល B នេះ​ក្រោយ​ជ័យជំនះ​លើ​ហ្វាំ​ង​ឡង់ ២-០ យប់​មិញ​ដែល​បើកផ្លូវ​អោយ​ដា​ណឺ​ម៉ា​កមាន​កៅអី​លេខ២ ក្នុង​ពូ​ល​។ ​នៅក្នុង​ពូ​ល B នេះ​ប៊ែ​ល​ហ្ស៊ិ​កលើ​គេ​មាន ៩ពិន្ទុ​ពេញ​ លេខ២ ដា​ណឺ​ម៉ាក​មាន ៣ពិន្ទុ​ចំណេញ ១គ្រាប់ លេខ៣ ហ្វាំ​ង​ឡង់​ខាត ២គ្រាប់​រង់ចាំ​ប្រៀបធៀប​ជាមួយ​ក្រុម​លេខ៣ ពូ​ល​ផ្សេងទៀត​ក្រែង​បាន​កៅអី​នៅ​ជុំ​បន្ត ​ខណៈ​រុស្ស៊ី​ក្រោម​គេមាន ៣ពិន្ទុ​ខាត​គ្រាប់​បាល់ ៥គ្រាប់​ហាលអាវ​ត្រឹមនេះ​។ ​លេខ១ ក្នុង​ពូ​ល B ប៊ែ​ល​ហ្ស៊ិ​ក​នឹងត្រូវ​ជួប​ជាមួយ​ក្រុម​លេខ៣ ល្អ​បំផុត​ពី​ពូ​ល A/E/F ចំណែក​លេខ២ ពូ​ល B នេះ​គឺ​ដា​ណឺ​ម៉ាក​ត្រូវ​ជួប​ជាមួយ​ក្រុម​លេខ២ ពូ​ល A វែ​ល​នៅ​វគ្គ ១៦ក្រុម​ចុងក្រោយ​។

​ក្រឡេក​មក​ពូ​ល C វិញ​ហូ​ឡង់​រកបាន​ជ័យជំនះ​ ៣ប្រកួត​ពេញ​ដូច​ប៊ែ​ល​ហ្ស៊ិ​ក​ដែរ​ក្រោយ​យកឈ្នះ​ម៉ា​សេ​ដ្វា​ន់​ខាងជើង ៣-០ ដោយ​ ២​គ្រាប់​របស់ Georginio Wijnaldum និង​ ១​គ្រាប់​របស់ Memphis Depay​។ ​លេខ១ ក្នុង​ពូ​ល C នេះ​ហូ​ឡង់​នឹងត្រូវ​ជួប​ជាមួយ​ក្រុម​លេខ៣ ល្អ​បំផុត​មកពី​ពូ​ល D/E/F​។ ​ចំណែក​មួយ​ប្រកួត​ទៀត​ក្នុង​ពូ​ល C នេះ​អូទ្រីស​ដើម្បី​បាន​កៅអី​ស្វ័យប្រវត្តិ​លេខ២ ក្នុង​ពូ​ល​ក្រោយ​យកឈ្នះ​អ៊ុយ​ក្រែ​ន ១-០ ដែល​ធ្វើឱ្យ​ក្រុម​របស់លោក Franco Foda ឡើង​ជួប​ក្រុម​លេខ១ ពូ​ល A អ៊ីតាលី​នៅ​វគ្គ ១៦ក្រុម​ចុងក្រោយ​៕

​អត្ថបទ​៖​នាង សុភា​វុ​ធ