ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បាន​គូស​បញ្ជាក់​ថា កម្ពុជាកំពុងត្រូវការអ្នកវិនិយោគដើម្បីកែច្នៃ និងវេចខ្ចប់ផលិតផលកសិកម្ម សម្រាប់​ការ​នាំ​ចេញ​ទៅ​ប្រទេសចិន និងទីផ្សារអន្តរជាតិ ខណៈកម្ពុជា បាន ប្រកាស​ស្វាគមន៍​ចំពោះ​ការ​វិនិយោគ​លើ​វិស័យកសិកម្មនៅក្នុងស្រុក។

នៅក្នុងជំនួបការងារជាមួយអ្នកវិនិយោគចិន នាព្រឹកថ្ងៃទី៣ ខែមករា ឆ្នាំ២០២៤នេះ ឯក​ឧត្តម​រដ្ឋ​មន្ត្រី​ បានមានប្រសាសន៍ថា កម្ពុជាកំពុងត្រូវការអ្នកវិនិយោគដើម្បីកែច្នៃ និងវេចខ្ចប់​ផលិតផល​កសិកម្ម សម្រាប់ការនាំចេញទៅប្រទេសចិន និងទីផ្សារអន្តរជាតិ ជាពិសេសអង្ករប្រណិត ស្វាយចន្ទី កៅស៊ូ ផលិតផលជលផលទឹកសាប និងវារីវប្បកម្ម ព្រមទាំង​ផលិតផល​កសិកម្ម​ដែល​មាន​សក្តានុពលផ្សេងៗទៀត ដែលមានតម្លៃបន្ថែមខ្ពស់ ផ្តល់ផលចំណេញដល់កសិករ និង​អ្នក​វិនិយោគ។

បើតាម ឯកឧត្តមរដ្ឋមន្ត្រី រាល់ការវិនិយោគត្រូវមានការសិក្សា មានផែនការវិនិយោគច្បាស់លាស់ និង​ទីផ្សារពិតប្រាកដ ដើម្បីធានាឱ្យការវិនិយោគស្របតាមគោលនយោបាយជាតិ ទទួល​បាន​ការ​គាំទ្រ ផ្តល់ផលចំណេញ និងមាននិរន្តរភាពសេដ្ឋកិច្ច។

ឯកឧត្តម​រដ្ឋមន្ត្រី បានគូសបញ្ជាក់បន្ថែមអំពីយន្តការគោលនយោបាយអាទិភាពក្នុងវិស័យកសិកម្ម នៃ​រាជរដ្ឋាភិបាលអាណត្តិទី៧នេះ ដែលផ្ដោតលើការកសាងសហគមន៍កសិកម្មទំនើប និង​ការ​ដាក់​ពង្រាយមន្ត្រីកសិកម្មឃុំ៕ ដោយ ៖ បូរ៉ាវី